O‘zbekistonlik iqtidorli shaxmatchi Javohir Sindarov 3 aprel kuni Kiprning Pafos shahrida o‘tkazilayotgan 2026 yilgi Nomzodlar turnirining 5-turida amerikalik gigant Hikaru Nakamuraga qarshi qora donalarda maydonga tushdi va yana bir muhim g‘alabaga erishdi.
Dunyo reytingida Magnus Karlsendan keyingi o‘rinda turgan qudratli raqibiga qarshi Sindarov debyutdanoq tez va aniq harakatlar amalga oshirib, Nakamurani cho‘lga tushirdi. Nakamura 13-yurishini o‘ylash uchun 67 daqiqadan ortiq vaqt sarfladi va bu Javohirga taktik ustunlikni taʼminladi. Oxirida amerikalik shaxmatchi taslim bo‘lishga majbur bo‘ldi.
Bu g‘alaba Sindarov uchun turnirdagi to‘rtinchi yutuq, shu bilan birga qatorda uchinchi g‘alaba hisoblanadi. Hozircha u 5 imkoniyatdan 4,5 ochko to‘plab, turnirda peshqadamlikni saqlab qolmoqda. Shu bilan Javohir Nomzodlar turniri tarixida startdan shu qadar yuqori natija qayd etgan ilk o‘zbekistonlik shaxmatchiga aylandi.
Qolaversa, Sindarov turnirning asosiy favoritlaridan ikkisini mag‘lub etdi: avvalroq amerikalik Fabian Karuanani ham taslim qilgandi, u jahon reytingida uchinchi o‘rinda edi. Yana bir g‘alaba evaziga Javohir dunyo reytingida ham qo‘shimcha ballar qo‘lga kiritdi va beshinchi o‘ringa ko‘tarildi. Hozirda dunyoning eng kuchli besh shaxmatchisidan ikkisi o‘zbekistonlik sportchilardir.
Endi Sindarov 4 aprel kuni 6-tur doirasida xitoylik Vey Iga qarshi harakat qiladi. Turnir 29 martdan 15 aprelgacha davom etadi va unda jahonning yetakchi sakkiz nafar nomdor shaxmatchisi qatnashmoqda.
Har bir shaxmatchi ikki davrada jami 14 partiya o‘ynaydi, yaʼni oldinda yana 9 tur bor. G‘olib pul mukofotlaridan tashqari (g‘oliblik uchun 48 ming yevroga ega bo‘ladi, shuningdek har yarim ochko uchun 3500 yevrodan oladi) amaldagi jahon chempioni, hindistonlik Dommaradju Gukeshga qarshi shaxmat toji uchun kurash olib borish huquqini qo‘lga kiritadi.
Javohirning mahorati va tezkor fikrlash qobiliyati muxlislarni yana-da hayratga solib, O‘zbekiston shaxmat tarixida yangi rekordlar va hisobiga kiruvchi g‘alabalarni belgilab bormoqda.
“Zamin”ni Telegramʻda oʻqing!
