Aralash jang sanʼatlari olamida o‘zining qatʼiyati va kuchli ruhi bilan tanilgan Xamzat Chimayev bu safar oktagondan tashqaridagi qarashlari bilan eʼtibor markaziga tushdi. U moliyaviy imkoniyatlar, jamoatga yordam va tanqidlarga munosabati haqida samimiy fikrlar bildirdi.
Jangarining taʼkidlashicha, pul uning uchun shunchaki boylik emas, balki atrofidagi odamlarga manfaat keltirish vositasi hisoblanadi. «Men pul orqali insonlarga yordam berish imkoniga egaman. Masalan, o‘z qishlog‘imda sportzal qurdim. Bu taxminan 600–700 ming dollarga tushdi. Shu bilan birga, mahalliy aholi orasida kimgadir yordam kerak bo‘lsa yoki kasal bo‘lsa, qo‘limdan kelgancha ko‘mak beraman», — deydi u.
Shu bilan birga, Chimayev uning kam jang o‘tkazayotgani haqida bildirilayotgan tanqidlarga ham befarq ekanini ochiq aytdi. Uning so‘zlariga ko‘ra, tanqidchilarning gaplari unga taʼsir qilmaydi: «Kimdir mening kam jang qilayotganimni gapirsa ham, menga baribir. Men millionlab pul ishlayapman, ular esa faqat gapirish bilan cheklanishadi va amalda hech narsa qilmaydi».
Eslatib o‘tish joiz, Chimayev yaqin kunlarda yana oktagonga qaytishi kutilmoqda. U 10 may kuni Nyuark shahrida amerikalik jangchi Shon Striklendga qarshi bahs olib boradi. Bu to‘qnashuv muxlislar tomonidan katta qiziqish bilan kutilayapti.
Maʼlumot uchun, mashhur jangchining ildizlari Chechen Respublikasidagi Gvardiya qishlog‘iga borib taqaladi. U yerda amalga oshirilgan ijtimoiy loyihalar esa Chimayevning nafaqat sportchi, balki jamoatparvar inson sifatida ham shakllanayotganini ko‘rsatadi.
Qisqasi, Chimayev uchun oktagondagi g‘alaba ham, hayotdagi harakat ham bir xil — gap bilan emas, amal bilan isbotlanadi.
“Zamin”ni Telegramʻda oʻqing!
