Chempionlar Ligasi chorakfinal bosqichi doirasida “PSJ”ga qarshi kechgan va 0:2 hisobida yakunlangan uchrashuvdan so‘ng “Liverpul” bosh murabbiyi Arne Slot o‘z fikrlari bilan o‘rtoqlashdi. Uning taʼkidlashicha, jamoa hali ham umumiy natijani o‘zgartirish va kambek qilish imkoniyatiga ega.
Murabbiy futbolda har qanday ssenariy yuz berishi mumkinligini alohida urg‘u bilan taʼkidladi. «Kambekka ishonch bormi? Albatta, bor. Futbolda hamma narsa bo‘lishi mumkin. Bugun yutqazdingiz — ertaga esa butunlay boshqa o‘yin ko‘rsatishingiz mumkin», — deya ishonch bilan gap boshladi Slot.
U misol sifatida yaqinda bo‘lib o‘tgan “Atletiko” va “Barselona” o‘rtasidagi bahsni keltirib o‘tdi. «Men “Atletiko”ning “Barselona”ni 2:0 hisobida mag‘lub etganini ko‘rdim. O‘yin taqdirini turli holatlar hal qiladi: qizil kartochka, penalti berilishi yoki berilmasligi, maydondagi kutilmagan vaziyatlar», — dedi mutaxassis.
Shuningdek, Slot javob uchrashuvi “Enfild” stadionida o‘tishi jamoa uchun katta ustunlik bo‘lishini ham qayd etdi. Uning fikricha, muxlislar qo‘llab-quvvatlovi “Liverpul”ni ruhlantirishi va natijaga taʼsir ko‘rsatishi mumkin.
Murabbiy avvalgi tajribani ham eslab o‘tdi. “«Galatasaroy”ga qarshi safarda mag‘lub bo‘lganimizdan keyin ko‘pchilik salbiy fikr bildirdi. Ammo oradan bir hafta o‘tib biz eng yaxshi o‘yinimizni namoyish etib, keyingi bosqichga chiqqandik», — deya o‘tmishdagi kambekni yodga oldi u.
Qisqasi, “Liverpul” hozircha taslim bo‘lgani yo‘q. Jamoa va murabbiylar shtabi oldidagi vazifa aniq — “Enfild”dagi javob bahsida barchasini o‘zgartira olish. Muxlislar esa yana bir dramatik kambekka guvoh bo‘lishni umid qilmoqda.
“Zamin”ni Telegramʻda oʻqing!
