Liverpul klubi kutilmagan bayonot bilan chiqib, jamoa bosh murabbiyi Arne Slot bilan xayrlashganini rasman eʼlon qildi. Niderlandiyalik mutaxassis Enfilddagi ikki yillik faoliyatidan soʻng Angliya Premer-ligasi gigantini tark etdi. Ushbu qaror jamoaning sovrinsiz yakunlangan omadsiz mavsumidan soʻng qabul qilindi. Bu haqda Goal.com xabar beradi.
Klub va egalari tomonidan eʼlon qilingan qoʻshma bayonotda Slotning isteʼfosi juda qiyin qaror boʻlgani taʼkidlangan. Arne Slot oʻzining debyut mavsumida Angliya Premer-ligasi chempionligini qoʻlga kiritgan boʻlsa-da, keyingi pasayish natijasida jamoa turnir jadvalida beshinchi oʻrinni egalladi va barcha sovrinlardan quruq qoldi.
Klub rahbariyati murabbiyning mehnatsevarligi va professionalligini yuqori baholab, unga minnatdorchilik bildirdi: “Arne Slotning Liverpul uchun qoʻshgan hissasi beqiyos. U oʻz sohasining yetakchisi ekanini isbotladi. Shunga qaramay, jamoaning kelajakdagi rivoji uchun yoʻnalishni oʻzgartirish vaqti keldi deb hisoblaymiz”.
Isteʼfodan soʻng koʻp oʻtmay, taniqli jurnalist Fabrizio Romano orqali Arne Slotning muxlislarga yoʻllagan murojaati eʼlon qilindi. Murabbiy Liverpuldagi faoliyatidan mamnunligini bildirib, shunday dedi: “Liverpul bilan birga oʻtkazgan vaqtim ajoyib sayohat boʻldi. Oʻtgan mavsumda chempionlikni qoʻlga kiritganimizdan juda minnatdorman”.
Arne Slot Liverpul tarixida chempion murabbiy sifatida qoladi. Klub rahbariyati uning merosi saqlanib qolishini va u har doim Enfildda aziz mehmon boʻlishini taʼkidladi. Endilikda mersisaydliklar yangi mavsum uchun boshqa nomzodlarni koʻrib chiqishni boshlaydilar.
“Zamin”ni Telegramʻda oʻqing!
