Yevropa futbol bozori yana qiziy boshladi. Ispaniyaning titan klubi «Real Madrid» va Angliya giganti “Liverpul” rahbariyati tarkibni kuchaytirish maqsadida kutilmagan transfer ssenariysini ko‘rib chiqmoqda. Gap yarimhimoya chizig‘ida o‘ynaydigan ikki yosh va isteʼdodli futbolchini o‘zaro almashish ehtimoli haqida ketmoqda.
Manbalarga ko‘ra, asosiy variant sifatida “Real”ning fransuz yarimhimoyachisi Eduardu Kamavinga hamda “Liverpul”ning argentinalik yulduzi Aleksis Makallister nomlari tilga olinmoqda. TEAMtalk nashri maʼlumotiga ko‘ra, mersisaydliklar Kamavingaga bir necha oydan buyon qiziqish bildirib kelmoqda, “Real” esa yarimhimoya markazini yangidan qurish rejasini ishlab chiqmoqda.
Madrid klubi faqatgina bitta variant bilan cheklanib qolmayapti. Skautlar jamoasi «Manchester Siti» yetakchilaridan biri Rodrini ham kuzatib bormoqda. Ammo klub rahbariyati himoya-yarimhimoya markazini yana-da mustahkamlash uchun qo‘shimcha top futbolchini ham olib kelishni maqsad qilgan.
Shu bois ro‘yxatda bir nechta yirik nomlar bor. Makallisterdan tashqari “Chelsi”ning asosiy figuralaridan biri Enso Fernandes hamda “PSJ” yulduzi Vitinya ham ehtimoliy variantlar sifatida ko‘rib chiqilmoqda.
Biroq vaziyat har doimgidek oson emas. Jurnalist Florian Plettenberg avvalroq maʼlum qilganidek, Eduardu Kamavinga hozircha “Real”ni tark etishni rejalashtirmayapti. Uning klub bilan amaldagi shartnomasi 2029 yilning yarmigacha davom etadi, bu esa har qanday transfer muzokaralarini ancha murakkablashtiradi.
Shu bilan birga, futbol olamida bunday katta almashuv g‘oyalari odatda ko‘p muhokama qilinadi, ammo amalga oshishi har doim ham oson kechmaydi. Har ikki klub ham kelajakka mo‘ljallangan strategik rejalar ustida ishlayapti va har bir qaror katta ehtiyotkorlik bilan qabul qilinadi.
“Zamin”ni Telegramʻda oʻqing!
