O‘zbek futbolida adolat va shaffoflikni taʼminlash yo‘lida navbatdagi keskin qadam tashlandi. PFL Ijroiya qo‘mitasining shoshilinch yig‘ilishida hakamlik sohasidagi tizimli muammolar va shubhali qarorlar atroflicha muhokama қилинди. Zamin.uz millionlar o‘yinidagi «adolat tarozisi» bilan bog‘liq so‘nggi tafsilotlarni taqdim etadi.
VAR — adolat qurolimi yoki manfaatlar mashinasi?
Liga bosh direktori Diyor Imomxo‘jayev yig‘ilishda hakamlik faoliyati va VAR tizimi atrofidagi tushunarsiz holatlarga to‘xtalib o‘tdi. Taʼkidlanishicha, Liga tomonidan hakamlarga ko‘maklashish uchun eng zamonaviy texnik vositalar, hatto ko‘chma televizion stansiyalar taqdim etilsa-da, maydondagi qarorlar hamon ko‘plab eʼtirozlarga sabab bo‘lmoqda. Imomxo‘jayevning fikricha, VAR ayrim hollarda odillikka xizmat qilish o‘rniga, kimlarningdir manfaatlarini himoya qiluvchi vositaga aylanib qolgandek tuyulmoqda.
Qo‘qondagi bahsli vaziyat va “sirli” audioyozuvlar
Superliganing 6-turidan o‘rin olgan “Qo‘qon-1912” va “Nasaf” uchrashuvidagi holat Liganing sabr kosasini to‘ldirdi. O‘yindagi bahsli vaziyatdan so‘ng, Liga O‘zbekiston futbol hakamlari markazidan (O‘zFHM) VAR audioyozuvlarini talab qilgan. Biroq Markazning turli bahonalar bilan buni kechiktirishi shubhalarni yana-da kuchaytirdi. Eʼtiborlisi, Ekspertlar guruhi ham o‘sha vaziyatda VAR hakami bosh hakamni chaqirib xato qilganini tasdiqladi.
Ikki hakam mavsum so‘ngigacha chetlatildi
Ijroiya qo‘mitasi aʼzolari futbol jamoatchiligining ishonchini qaytarish va qolgan hakamlarga o‘rnak bo‘lishi uchun qatʼiy chora ko‘rishga qaror qildi. Unga ko‘ra:
- Bosh hakam Rustam Lutfullin va VAR hakami Ibrohim Ismoilov mavsum yakuniga qadar Superliga, Proliga va O‘zbekiston kubogi bahslaridan butunlay chetlashtirildi.
- Shuningdek, ularning xalqaro toifadagi maqomiga munosibligini qayta ko‘rib chiqish bo‘yicha O‘FA prezidentiga murojaat yo‘llandi.
Tizimli islohotlar davr talabi
Yig‘ilishda belgiliyalik mutaxassis Gi Kiala boshchiligidagi islohotlarning natijasi sezilmayayotgani ham tanqid ostiga olindi. Endilikda VAR markazi va hakamlar faoliyatida shaffoflikni oshirish uchun yangi reglament ishlab chiqilishi kutilmoqda. Liga prezidentimiz tomonidan yaratilgan zamonaviy sharoitlardan oqilona foydalanish, futboldagi illatlarga qarshi birgalikda kurashish shartligini yana bir bor uqtirdi.
Futbolda xatolar bo‘lishi tabiiy, biroq ularning qasddan yoki tizimli ravishda takrorlanishi millionlab muxlislarning ishonchiga putur yetkazadi.
Aziz futbol ishqibozlari, siz hakamlarning bu galgi chetlatilishiga qanday qaraysiz? VAR tizimi o‘zbek futboliga haqiqatda adolat olib keldimi?
“Zamin”ni Telegramʻda oʻqing!
