Madridning “Real” klubi sobiq yarimhimoyachisi Toni Kroos Chempionlar ligasi chorakfinali doirasida “Bavariya” va “Real” o‘rtasidagi ilk uchrashuvni tahlil qildi.
Myunxen jamoasi dastlabki bahsda “Real” maydonida 2:1 hisobida g‘alaba qozongan bo‘lsa-da, Kroosning fikricha, ular uchrashuvdagi psixologik ustunlikni to‘liq ushlab qola olmagan.
“Bo‘lib o‘tgan voqealar meni hayron qoldirmadi, chunki ‘Bavariya‘ juda yaxshi o‘ynadi. Biroq ular 2:0 hisobida oldinga chiqqandan keyin yuz bergan holat eng kutilmagan psixologik burilish nuqtasi bo‘ldi.
So‘nggi yillarda ‘Bavariya‘ ‘Real‘ga qarshi yaxshi o‘ynab kelmoqda, ammo javob uchrashuvlarida kichik xatolar sabab ko‘pincha kerakli natijani saqlab qola olmaydi.
2:0 holatida bahsni yakunlashga yaqinlashish kerak edi. Lekin ‘Bavariya‘ himoyada pasaydi, agressivlikni yo‘qotdi”, — dedi Kroos.
Uning taʼkidlashicha, o‘sha pallada nemis jamoasi o‘yinni to‘liq nazorat qilgan va hatto hisobni oshirish imkoniyatiga ega bo‘lgan.
“Men ulardan yana bir necha gol kutgandim — uchinchi, to‘rtinchi, hatto beshinchisi ham bo‘lishi mumkin edi. Ammo aksincha holat yuz berdi.
Upamekanoning Vinisius bilan vaziyatdagi xatosi o‘yinni burib yubordi. Shundan keyin ‘Real‘ xarakter ko‘rsatdi va 60–75-daqiqalar oralig‘ida bir nechta xavfli vaziyat yaratdi.
Menimcha, ochiq va tezkor futbolga o‘tilgan paytda ‘Real‘ dunyodagi eng xavfli jamoaga aylanadi. Bu ularning tabiatiga mos uslub.
Shu sabab ‘Real‘ hisobni tenglashtirishga juda yaqin keldi. Hatto o‘yin 3:3 ham bo‘lishi mumkin edi, lekin oxir-oqibat 2:1 bilan yakunlandi”, — dedi Kroos.
Ekspertlarning fikricha, bu duelning javob o‘yinida intriga yana-da kuchli bo‘lishi kutilmoqda.
“Zamin”ni Telegramʻda oʻqing!
