Madridning mashhur “Real” klubi sobiq futbolchisi Xose Santamariya 96 yoshida olamdan o‘tdi. Bu haqda klubning rasmiy matbuot xizmati maʼlum qildi.
“Qirollik klubi” marhum futbolchi xotirasiga chuqur hamdardlik bildirdi va uni jahon futbolining haqiqiy afsonalaridan biri sifatida eʼtirof etdi. Klub bayonotida qayd etilishicha, Santamariya Yevropa chempionlar kubogini bir necha bor qo‘lga kiritgan tarixiy jamoaning muhim aʼzosi bo‘lgan.
“Klubimiz hamdardlik bildiradi. Santamariya ‘Real‘ va jahon futbolining afsonalaridan biri edi. U bir necha bor Yevropa chempionlar kubogini qo‘lga kiritgan jamoa aʼzosi bo‘lgan”, — deyiladi rasmiy bayonotda.
Futbolchining “Real”dagi faoliyati davomida u Ispaniya chempionatini olti marta yutgan va Yevropa chempionlar kubogida to‘rt bor zafar quchgan.
Xose Santamariya aslida Urugvayda tug‘ilgan bo‘lib, 1948–1957 yillar davomida “Nasyonal” klubi sharafini himoya qilgan. Keyin esa u Yevropaga yo‘l olib, Madridning “Real” klubiga o‘tib, 1966 yilgacha ushbu jamoa safida to‘p tepgan.
Markaziy himoyachi sifatida maydonga tushgan Santamariya Ispaniya terma jamoasi tarkibida 16 ta o‘yinda ishtirok etgan.
Futbol dunyosi yana bir afsona bilan xayrlashdi — Xose Santamariya xotiralarda qoladi.
“Zamin”ni Telegramʻda oʻqing!
