«Chelsi» hamda Braziliya terma jamoasi hujumchisi Estevao Villian boʻlajak jahon chempionatida qatnashmasligi ehtimolga yaqin. Bu holat APL 33-turi doirasida «Manchester Yunayted»ga qarshi oʻyinda (0:1) olgan ogʻir jarohati bilan bogʻliq.
Shifokorlar tashxisiga koʻra, futbolchi son orqa mushagining toʻrtinchi darajali shikastlanishini olgan. The Athletic maʼlumotiga asosan, uning tiklanish jarayoni uch oydan olti oygacha davom etishi mumkin.
Bu esa uning Jahon chempionatida ishtirok etishi borasida jiddiy savol belgisi qoʻymoqda. Chunki bunday turdagi jarohat uzoq muddatli reabilitatsiya talab qiladi.
Estevao Angliya Premer-ligasidagi debyut mavsumida «Chelsi» safida 36 ta oʻyin oʻtkazib, 8 ta gol urdi va 4 ta golli uzatma amalga oshirdi. U 2025 yil yozida «Palmeyras»dan 29 million yevro evaziga London klubiga oʻtgan edi.
Braziliya terma jamoasida esa u 2024 yil sentyabr oyida, atigi 17 yoshida debyut qilgan. Shu vaqtgacha milliy jamoa tarkibida 11 ta oʻyinda maydonga tushib, 5 ta gol urishga muvaffaq boʻlgan.
Qisqasi, yosh yulduz uchun bu jarohat faoliyatida jiddiy toʻxtalish nuqtasi boʻlishi mumkin. Endi barcha eʼtibor uning tez va toʻliq tiklanishiga qaratilgan.
