"Manchester Siti" klubi yozgi transfer oynasida "Chelsi" yarim himoyachisi Enso Fernandesni o'z safiga qo'shib olish imkoniyatlarini ko'rib chiqmoqda. Manchesterliklar jamoaning markaziy qismini kuchaytirish maqsadida argentinalik jahon chempionini asosiy nomzod sifatida tanlagan. Gvardiola boshchiligidagi murabbiylar shtabi Fernandesning o'yinni boshqarish qobiliyatini yuqori baholamoqda. Bu haqda Goal.com xabar beradi.
Klub mutasaddilari tarkibda jiddiy o'zgarishlarni amalga oshirishni rejalashtirgan. Rodrining jarohatlari va Bernardo Silvaning mavsum yakunida jamoani tark etishi kutilayotgani sababli, Enso Fernandes "shaharliklar" uchun eng maqbul yechim sifatida ko'rilmoqda. Uning maydonni ko'rish qobiliyati va uzatmalar aniqligi "Man Siti" taktik uslubiga to'liq mos keladi.
Fernandesning "Chelsi" bilan 2032-yilgacha shartnomasi mavjud bo'lsa-da, London klubining moliyaviy holati va tarkibni qisqartirish zarurati muzokaralarga yo'l ochishi mumkin. Argentinalik futbolchi "Benfika"dan rekord summaga transfer qilinganidan buyon "aristokratlar"ning asosiy o'yinchisi bo'lib qolmoqda, biroq nufuzli sovrinlar uchun kurashish istagi uni Manchesterga chorlashi ehtimoli bor.
Hozircha klublar o'rtasida rasmiy aloqa o'rnatilmagan, ammo "Man Siti" skautlari futbolchining har bir harakatini kuzatib bormoqda. "Chelsi"ning mavsum yakunidagi o'rni va yangi murabbiyning rejalari ushbu transfer taqdirini belgilab beradi. Agar tomonlar kelishuvga erishsa, bu yozning eng shov-shuvli kelishuvlaridan biriga aylanishi kutilmoqda.
“Zamin”ni Telegramʻda oʻqing! 
