«Manchester Siti»ning tezkor vingeri Jeremi Doku Angliya Liga kubogi finalida «Arsenal» ustidan qozonilgan muhim gʻalaba haqida oʻz fikrlari bilan oʻrtoqlashdi. Uning taʼkidlashicha, bu natija nafaqat navbatdagi sovrin, balki raqib uchun jiddiy psixologik bosim ham boʻlgan.
— Karabao kubogi — juda nufuzli va qimmatli trofey. Biz gʻalaba qozonsak, bu «Arsenal» uchun ruhiy jihatdan ogʻir zarba boʻlishini yaxshi tushunardik. Shuning uchun bor eʼtiborimizni oldinga qaratishga va faqat gʻalaba uchun kurashishga qaratdik, — dedi Doku jurnalist Jek Goganga bergan intervyusida.
Eslatib oʻtamiz, final uchrashuvida «shaharliklar» «Arsenal»ni 2:0 hisobida ishonchli magʻlub etgandi. Ushbu zafardan soʻng Xosep Gvardiola shogirdlari ruhiy ustunlikni saqlab qolgan holda Angliya Premer-ligasida ham londonliklar ustidan yana bir bor gʻalaba qozonishga muvaffaq boʻlishdi. Ayni paytda «Manchester Siti» chempionat jadvalida peshqadamlikni qoʻlga kiritgan.
Jamoa oldidagi navbatdagi sinov esa 35-tur doirasidagi «Everton»ga qarshi safar uchrashuvi boʻladi. Mazkur bahs ham chempionlik poygasida hal qiluvchi ahamiyat kasb etishi mumkin.
Qisqasi, «Manchester Siti» nafaqat sovrinlar uchun, balki raqiblar ustidan ruhiy ustunlikni saqlash uchun ham kurashni davom ettirmoqda.
“Zamin”ni Telegramʻda oʻqing!
