"Bavariya" bosh murabbiyi Vinsent Kompany diskvalifikatsiya tufayli Chempionlar ligasi yarim finalining "PSJ"ga qarshi birinchi uchrashuvini o'tkazib yuboradi. Uning o'rnini vaqtinchalik yordamchisi Aaron Danks egallaydi. Bu haqda Goal.com xabar beradi.
Danks bungacha "Aston Villa"da ham vaqtinchalik murabbiy sifatida faoliyat yuritgan va bir marta yirik g'alaba, bir marta mag'lubiyat qayd etgan.
Danks Myunxen klubida asosan standart vaziyatlar uchun mas'ul hisoblanadi. Statistika shuni ko'rsatadiki, "Bavariya" bu borada qarama-qarshi natijalarga ega.
Jamoa joriy mavsumda o'tkazib yuborgan 52 ta goldan 20 tasi, ya'ni 38 foizi aynan standart vaziyatlardan keyin sodir bo'lgan. Bu ko'rsatkich Bundesligadagi o'rtacha 24 foizdan ancha yuqori.
Shu bilan birga, hujumda vaziyat butunlay boshqacha. Kompany o'z jamoasini standart vaziyatlardan gol urish bo'yicha Yevropaning eng yaxshilaridan biri deb hisoblaydi.
Myunxenliklar Germaniya chempionatida burchak to'plaridan 13 ta gol urishga muvaffaq bo'lishdi. Danks yangi taktikalar yaratishda Arjen Robben va Frank Riberi davridagi eski usullardan ham foydalanishini tan olgan.
UEFA qoidalariga ko'ra, Kompany o'yin vaqtida Danks bilan aloqaga chiqa olmaydi. U uchrashuvni tribunadan kuzatadi va kiyinish xonasiga faqat o'yin tugaganidan 10 daqiqa o'tib kirishi mumkin.
Aaron Danks o'z faoliyatini 15 yoshida boshlagan va Angliya yoshlar terma jamoalarida Jud Bellingem hamda Jamal Mussiala kabi yulduzlar bilan ishlagan.
“Zamin”ni Telegramʻda oʻqing!
