"Barselona" klubi yozgi transfer oynasida "Atletiko" hujumchisi Xulian Alvaresni sotib olish bo'yicha dastlabki muzokaralarga kirishdi. Kataloniyaliklar argentinalik jahon chempionini jamoani erkin agent sifatida tark etishi kutilayotgan Robert Levandovskining o'rniga asosiy nomzod sifatida ko'rmoqda. Bu haqda Goal.com xabar beradi.
ESPN xabariga ko'ra, 26 yoshli hujumchi "River Pleyt" va "Man Siti"dagi faoliyati davomida ham skautlar nazoratida bo'lgan. Biroq transfer oson kechmaydi, chunki Alvaresning shartnomasida 500 mln yevro miqdorida tovon puli belgilangan va Madrid klubi uni kamida 120 mln yevroga baholamoqda.
Levandovskining kelajagi esa Italiya bilan bog'lanmoqda. Kelasi mavsumda 38 yoshga to'ladigan polshalik hujumchiga "Yuventus" va "Milan" klublari qiziqish bildirmoqda.
Uning maoshi qisqarishi va zaxira o'rindig'iga o'tishi haqidagi takliflar futbolchini qoniqtirmayapti.
Alvaresning agenti Fernando Idalgo futbolchining oilasi Kataloniyadan uy qidirayotgani haqidagi xabarlarni rad etdi. U bu ma'lumotlarni mutlaqo yolg'on deb atadi va oila a'zolari oxirgi marta Barselonada faqat o'yin kuni bo'lganini ta'kidladi.
Hujum chizig'ini kuchaytirish uchun "Barselona" boshqa variantlarni ham ko'rib chiqmoqda. Xususan, ijarada o'ynayotgan Markus Rashford va "Real Betis" vingeri Abde Ezzalzuli nomzodlari o'rganilmoqda.
Shuningdek, Ferran Torresning sotilishi moliyaviy holatni yaxshilashga yordam berishi mumkin.
“Zamin”ni Telegramʻda oʻqing!
