«Arsenal» klubi hujumchisi Bukayo Saka Axill payidagi jarohati sababli jamoaning Angliya chempionligi uchun kurashdagi eng muhim o'yinlaridan biri bo'lgan «Manchester Siti»ga qarshi bahsni o'tkazib yuborish xavfi ostida turibdi. Bu haqda Goal.com xabar beradi.
Londonliklar bosh murabbiyi Mikel Arteta futbolchining holati bo'yicha yangi ma'lumotlarni taqdim etdi. Murabbiyning so'zlariga ko'ra, vingerning tiklanishi uchun haftalar emas, balki bir necha kun talab etiladi, biroq u yaqin orada bo'lib o'tadigan uchrashuvlarda qatnasha olmaydi.
Saka jarohati sababli chorshanba kuni Chempionlar ligasi doirasida Portugaliyaning «Sporting» jamoasiga qarshi kechadigan o'yinda maydonga tushmasligi aniq bo'ldi. Tibbiy shtab futbolchini Premyer-liganing hal qiluvchi bahslariga tayyorlash ustida ishlamoqda.
Hozirda «Arsenal» tarkibida Sakadan tashqari yana bir necha asosiy o'yinchilarning jismoniy holati so'roq ostida turibdi. Arteta jamoaning chempionlik poygasidagi imkoniyatlarini saqlab qolish uchun tarkibni rotatsiya qilishga majbur bo'lishi mumkin.
“Zamin”ni Telegramʻda oʻqing! 
