Turkiyaning Istanbul shahri mezbonlik qilgan nufuzli “Istanbul Junior European Cup 2026” turniri oʻz yakuniga yetdi. Dunyoning 27 davlatidan 500 nafardan ortiq yosh dzyudochi ishtirok etgan musobaqa keskin va raqobatlarga boy tarzda oʻtdi.
Bellashuvlarning ikkinchi kuni oʻrta va ogʻir vazn toifalarida gʻoliblar aniqlandi. Oʻzbekiston sharafini himoya qilgan Fazliddin Rafikov +100 kg vazn toifasida barcha raqiblarini ishonchli tarzda magʻlub etib, shohsupaning eng yuqori pogʻonasini egalladi. U turnir davomida Rossiya, Niderlandiya, Yaponiya va Ozarbayjon vakillari ustidan ustunlikka erishib, haqli ravishda oltin medalni qoʻlga kiritdi.
Shuningdek, yurtimiz terma jamoasi aʼzolari ham munosib natijalarni qayd etishdi. Arapbay Daurbayev (-60 kg) va Sabina Azamatova (-52 kg) kumush medallarga sazovor boʻlsa, Xushnud Sultonov (-60 kg) bronza mukofotini qoʻlga kiritdi.
Jami hisobda birta oltin, ikki kumush va bir bronza medaliga ega chiqqan Oʻzbekiston yoshlar terma jamoasi umumjamoa hisobida 27 davlat orasida 4-oʻrinni egalladi. Bu natija yurtimiz dzyudochilarining xalqaro maydonda tobora mustahkam pozitsiyaga ega boʻlayotganini koʻrsatmoqda.
Oʻzbekiston dzyudo federatsiyasi matbuot xizmati maʼlumotiga koʻra, bu kabi musobaqalar yosh sportchilar uchun katta tajriba maktabi boʻlib xizmat qiladi.
Qisqacha aytganda, Istanbuldagi ushbu turnir oʻzbek dzyudochilari uchun yana bir muvaffaqiyatli sahifa boʻldi.
“Zamin”ni Telegramʻda oʻqing!
