"Manchester Yunayted" yarim himoyachisi Kazemiro Neymar Braziliyaning 2026-yilgi Jahon chempionati qaydnomasiga kiritilishini qo'llab-quvvatladi. Uning fikricha, hujumchi kubokni yutish uchun asosiy tarkibdagi o'rnidan voz kechishga tayyor. Bu haqda Goal.com xabar beradi.
Doimiy jarohatlar Neymarga 2023-yildan beri milliy jamoada o'ynashga to'sqinlik qilmoqda. Karlo Anchelotti 34 yoshli futbolchini yozgi musobaqa qaydnomasiga kiritishni istisno etmadi.
Uzoq tanaffus tufayli hujumchi asosiy tarkibga kiritilmasligi mumkin.
Kazemiro ESPN telekanaliga bergan intervyusida Neymar hech qachon jamoada asosiy yulduz bo'lishga intilmaganini ta'kidladi. Uning so'zlariga ko'ra, agar Anchelotti zaxira rolini taklif qilsa, Neymar buni qabul qiladi.
Braziliya terma jamoasini boshqarishi kutilayotgan Anchelotti yulduz futbolchilar bilan ishlashda katta tajribaga ega. Kazemiro italiyalik mutaxassis Neymarning holatini to'g'ri baholay olishiga ishonch bildirdi.
Hozirda "Santos" safida harakat qilayotgan Neymar o'zining jismoniy holatini tiklashga urinmoqda. Kazemiro Neymarning iqtidori shubhasiz ekanligini, ammo uning Jahon chempionatidagi ishtiroki faqat jismoniy tayyorgarligiga bog'liqligini qo'shimcha qildi.
“Zamin”ni Telegramʻda oʻqing!
