Yevropa Chempionlar Ligasida yarimfinalning javob uchrashuvlari yakunlanganidan keyin haftaning eng yaxshi futbolchilaridan iborat ramziy jamoa e’lon qilindi. Qizig‘i shundaki, bu safar ramziy tarkibda asosiy ustunlikni Londonning “Arsenal” hamda Parijning “PSJ” klublari futbolchilari egalladi.
Har ikki jamoadan to‘rt nafardan o‘yinchi haftaning eng kuchli tarkibiga kiritildi. Bu esa ularning hal qiluvchi bahslarda qay darajada yuqori saviyada o‘yin namoyish etganini yana bir bor tasdiqlab turibdi.
Darvozabon pozitsiyasida “Arsenal” posboni David Rayya tanlandi. Ispaniyalik kiper yarimfinalda jamoasini bir necha xavfli vaziyatlarda qutqarib qolib, ishonchli harakatlari bilan muxlislar va mutaxassislar e’tirofiga sazovor bo‘ldi.
Himoya chizig‘ida esa “PSJ” vakili Vilyam Pacho, “Atletiko” futbolchisi Pubil hamda “Arsenal” himoyachisi Vilyam Saliba joy oldi. Ayniqsa, Salibaning sovuqqon va ishonchli o‘yini yana bir bor yuqori baholandi.
Yarim himoyada tajriba va texnika uyg‘unlashgan tarkib shakllandi. “Bavariya” lideri Yozua Kimmix, “PSJ”ning yosh iste’dodi Dezire Due, “Arsenal” tayanch futbolchisi Deklan Reys hamda gruziyalik mahorat sohibi Xvicha Kvaratsxeliya ramziy jamoadan o‘rin oldi.
Xususan, Kvaratsxeliyaning “Bavariya”ga qarshi bahsdagi faolligi va hal qiluvchi vaziyatlardagi harakatlari Yevropa matbuotida katta muhokama qilinmoqda.
Hujum chizig‘iga esa “Arsenal” vingeri Bukayo Saka, “PSJ”ning tezkor forvardi Usmon Dembele va “Bavariya” hujumchisi Luis Dias kiritildi.
Mutaxassislar fikricha, bu haftagi ramziy jamoa Chempionlar Ligasidagi eng qiziq va dramatik bahslarda hal qiluvchi rol o‘ynagan futbolchilardan tuzilgan.
Ayniqsa, “Arsenal” va “PSJ” futbolchilarining ko‘pchilikni tashkil qilishi finalga chiqqan ikki jamoa hozir Yevropaning eng kuchli klublari qatorida ekanini ko‘rsatmoqda.
“Zamin”ni Telegramʻda oʻqing!
