Madridning “Real” klubida ichki muhit bilan bog‘liq muammolar tobora jiddiy tus olayotgani haqida xabarlar tarqalmoqda. Ispaniyaning mashhur Marca nashri ma’lumotiga ko‘ra, jamoa bosh murabbiyi Alvaro Arbeloa bilan ayrim futbolchilar o‘rtasidagi munosabatlar ancha sovuqlashgan.
Manba ta’kidlashicha, hozirda kamida olti nafar futbolchi mutaxassis bilan deyarli muloqot qilmayapti. Bu holat esa klub ichidagi muhitga salbiy ta’sir ko‘rsatayotgani aytilmoqda.
Shu bilan birga, muammo faqat murabbiy va futbolchilar o‘rtasida emas. Nashr ma’lumotiga ko‘ra, jamoa a’zolarining o‘zi ichida ham kelishmovchiliklar paydo bo‘lgan. Ayrim futbolchilar bir-biri bilan gaplashmasligi va munosabatlar ancha taranglashgani qayd etilmoqda.
Kuzatuvchilar fikricha, bu kabi vaziyat “Real” kabi katta klub uchun juda xavfli hisoblanadi. Chunki jamoadagi birdamlik va ichki muhit har qanday katta sovrinlar uchun kurashda hal qiluvchi omillardan biri sanaladi.
Eslatib o‘tamiz, Alvaro Arbeloa shu yil yanvar oyida Xabi Alonso klubni tark etganidan keyin “qaymoqranglilar” bosh murabbiyiga aylangan edi.
Yosh mutaxassis qo‘l ostida madridliklar hozirgacha 24 ta uchrashuv o‘tkazdi. Ularning 15 tasida g‘alaba qozonilgan bo‘lsa, 7 ta bahs mag‘lubiyat bilan yakunlangan.
Statistika yomon ko‘rinmasligiga qaramay, jamoa ichidagi muhit va ayrim futbolchilar bilan munosabatlar Arbeloa uchun jiddiy muammoga aylanishi mumkinligi aytilmoqda.
Ispaniya matbuoti hozircha qaysi futbolchilar murabbiy bilan kelisha olmayotganini ochiqlamagan. Ammo klub atrofidagi muhokamalar tobora kuchayib bormoqda.
Muxlislar esa bir savol ustida bosh qotirmoqda: Arbeloa jamoadagi vaziyatni nazorat ostiga qaytara oladimi yoki “Real”ni yana yangi o‘zgarishlar kutmoqdami?
“Zamin”ni Telegramʻda oʻqing!
