Real Madrid yarim himoyachisi Federico Valverde mashg‘ulotlar bazasida Aurelien Tchouameni bilan mushtlashgani haqidagi xabarlarni keskin rad etdi. Urugvaylik futbolchi mashg‘ulot vaqtida kelishmovchilik yuz berganini tan olgan bo‘lsa-da, hech qanday jismoniy to‘qnashuv bo‘lmaganini ta’kidladi. Bu haqda Goal.com xabar beradi.
Valverde shifoxonaga tushishiga sabab bo‘lgan bosh jarohatini tasodifiy hodisa deb atadi. Uning so‘zlariga ko‘ra, jamoa ichidagi hissiyotlar mavsum yakunidagi charchoq va muvaffaqiyatsizliklar tufayli keskinlashgan, biroq bu holat tashqi muhitda noto‘g‘ri talqin qilingan.
"Mashg‘ulot paytida jamoadoshim bilan kelishmovchilik yuz berdi, ammo bu shunchaki oddiy bahs edi. Boshimni stolga urib olganim sababli shifoxonaga borishga to‘g‘ri keldi, biroq bu janjal oqibati emas", — deb yozdi Valverde ijtimoiy tarmoqlarda.
Futbolchi Real Madrid uchun og‘ir kechayotgan mavsumda bunday mish-mishlarning tarqalishi jamoa obro‘siga putur yetkazayotganidan afsusda ekanini bildirdi. U jamoa ichidagi barcha kelishmovchiliklar maydonda unutilishini va klub uchun bor kuchini berishda davom etishini qo‘shimcha qildi.
“Zamin”ni Telegramʻda oʻqing!
