Inter sardori Lautaro Martinez o‘zining klubdan ketishi haqidagi xabarlarni keskin rad etdi. Argentinalik hujumchi Yevropaning yetakchi jamoalari qiziqishiga qaramay, Milanda qolish niyatida ekanligini va klub loyihasiga sodiqligini ta'kidladi. Bu haqda Goal.com xabar beradi.
So‘nggi vaqtlarda Barselona, Manchester Yunayted, Arsenal va PSJ kabi grand klublar Martinezni o‘z safiga qo‘shib olmoqchi ekani haqida ko‘plab xabarlar tarqalgandi. Biroq 28 yoshli futbolchi bu mish-mishlarga qaramay, o‘zini Milanda uyidagidek his qilayotganini va Interda baxtli ekanini aytdi.
Cronache di Spogliatoio nashriga bergan intervyusida Martinez shunday dedi: "Men Inter loyihasiga sodiqman, bu yerda o‘zimni uydagidek his qilaman. Oila a'zolarim ham xursand, shaharda o‘z restoranimiz bor va biz Milanni yaxshi ko‘ramiz. Birinchi kundan boshlab menga juda iliq munosabatda bo‘lishdi va men bu yerda ko‘plab maqsadlarimga erishdim".
2018-yilda Racing Club jamoasidan kelganidan buyon Lautaro Martinez Interning asosiy figurasiga aylandi. U klub safida o‘tkazgan 372 ta o‘yinda 173 ta gol urishga muvaffaq bo‘ldi. Hozirda u nafaqat jamoasi bilan chempionlik unvonini himoya qilmoqda, balki A Seriyaning eng yaxshi to‘purari bo‘lish uchun ham kurashmoqda.
“Zamin”ni Telegramʻda oʻqing!
