Angliya Chempionshipining pley-off bosqichi oldidan futbol muhitini larzaga solgan mojaro yuzaga keldi. Gap oddiy taktik kurash yoki matbuotdagi psixologik bosim haqida emas, balki raqib mashg‘ulotini yashirincha kuzatish va tasvirga olish bilan bog‘liq jiddiy ayblov haqida ketmoqda.
Yaqin shanba kuni “Midlsbro” o‘z maydonida Chempionship pley-off yarim finalining birinchi o‘yinida “Sautgempton”ni qabul qiladi. Keyingi seshanba kuni esa jamoalar o‘rtasida javob bahsi bo‘lib o‘tadi. Bu ikki uchrashuv nafaqat sport natijasi, balki klublar kelajagi uchun ham ulkan ahamiyatga ega.
Chunki Chempionship pley-offida g‘olib chiqqan jamoa Angliya Premer-ligasiga yo‘llanma oladi. Bu esa klubga taxminan 200 million funt atrofida moliyaviy daromad keltirishi mumkin. Bunday katta mablag‘ o‘rtaga tikilganda, har bir taktik detal, har bir standart vaziyat va hatto raqibning mashg‘ulotdagi kichik harakati ham qimmatli ma’lumotga aylanadi. Futbolda ba’zan bir burchak zarbasi ham millionlarga teng bo‘lib qoladi — ha, bu yerda romantika kam, biznes ko‘p.
The Athletic nashrining xabar berishicha, “Midlsbro”ning Rokliff-park bazasida bir erkak jamoa mashg‘ulotini yashirincha tasvirga olayotgani aniqlangan. Dastlabki taxminlarga ko‘ra, ushbu shaxs “Sautgempton” murabbiylar shtabiga aloqador bo‘lishi mumkin.
Ma’lum qilinishicha, “Midlsbro” xodimlaridan biri ushbu erkakni payqab, u bilan yuzma-yuz kelgan. Biroq gumonlanuvchi voqea joyidan qochib ketishga ulgurgan. Shundan so‘ng “Midlsbro” klubi Futbol Ligasiga rasmiy shikoyat yo‘llab, “Sautgempton”ni josuslikda ayblagan. Klub, shuningdek, kuzatuv kameralari yozuvlarini taqdim etishga tayyorligini bildirgan.
Hozirda ushbu holatni Futbol Ligasi o‘rganmoqda. Tergov jarayoni yakunida voqea haqiqatan ham qoidabuzarlik sifatida baholansa, “Sautgempton” uchun jiddiy oqibatlar kelib chiqishi mumkin. Ayniqsa, pley-off kabi asablar maksimal darajada tarang bo‘lgan pallada bunday mojaro jamoa muhitiga ham ta’sir o‘tkazishi ehtimoldan xoli emas.
Bu holat Angliya futboli uchun mutlaqo yangi voqea emas. 2019 yilda ham shunga o‘xshash janjal sodir bo‘lgandi. O‘shanda “Lids” bosh murabbiyi Marselo Belsa o‘z yordamchisini “Derbi” mashg‘ulotlarini kuzatish uchun yuborgani ma’lum bo‘lgan. Bu ish katta shov-shuvga sabab bo‘lib, Futbol Ligasi “Lids” klubini 200 ming funt jarimaga tortgan edi.
Aynan o‘sha voqeadan keyin klublarga o‘yindan 72 soat oldin raqib mashg‘ulotlarini kuzatishni taqiqlovchi qoida joriy qilingan. Shuning uchun “Midlsbro” bazasida sodir bo‘lgan ushbu holat oddiy qiziquvchanlik emas, balki belgilangan qoidalarni buzish sifatida ko‘rilishi mumkin.
Endi barcha e’tibor Futbol Ligasi qaroriga qaratilgan. Agar ayblovlar tasdiqlansa, bu pley-off oldidan “Sautgempton” uchun katta imidj zarbasi bo‘ladi. “Midlsbro” esa maydondagi kurashdan tashqari, adolat masalasida ham o‘z pozitsiyasini himoya qilishga kirishgan.
Bir narsa aniq: Premer-liga yo‘llanmasi uchun kurash har doim qattiq kechgan, ammo bu safar intriga maydon tashqarisida ham avjiga chiqdi. Endi muxlislar nafaqat o‘yin natijasini, balki josuslik mojarosi qanday yakun topishini ham katta qiziqish bilan kuzatadi.
“Zamin”ni Telegramʻda oʻqing!
