Manchester Siti bosh murabbiyi Pep Guardiola o‘z shogirdi Jeremy Doku dunyoning eng yaxshi qanot hujumchilaridan biriga aylanish salohiyatiga ega ekanligini ta’kidladi. Mutaxassis belgiyalik futbolchini Vinicius Junior va Lamine Yamal kabi yulduzlar bilan bir qatorga qo‘ydi. Bu haqda Goal.com xabar beradi.
Doku so‘nggi uchta o‘yinda ketma-ket gol urib, jamoasining Angliya Premer-ligasidagi g‘alabalariga katta hissa qo‘shmoqda. Brentfordga qarshi kechgan bahsdagi 3:0 hisobidagi g‘alabadan so‘ng, Guardiola o‘z qanot hujumchisining o‘yinidan mamnunligini yashirmadi va uning o‘sishda davom etishiga ishonch bildirdi.
Pep Guardiola futbolchining mahorati nafaqat jismoniy ko‘rsatkichlar, balki ruhiy tayyorgarlik bilan ham bog‘liqligini qayd etdi. Murabbiyning fikricha, o‘zini "eng yaxshilarning eng yaxshisi" deb hisoblash uchun futbolchi doimiy ravishda qulaylik zonasidan chiqib, o‘z ustida ishlashi va yangi marralarni zabt etishga intilishi kerak.
Jeremy Doku esa o‘zining sermahsul o‘yinini oddiy instinktlar bilan izohladi. Uning so‘zlariga ko‘ra, u har doim o‘z uslubida o‘ynab kelgan, biroq hozirda bu harakatlar samarali gollarga aylanmoqda. 23 yoshli futbolchi o‘z o‘yinini o‘zgartirmaganini, shunchaki maydonda o‘ziga ko‘proq erkinlik berayotganini ta’kidladi.
“Zamin”ni Telegramʻda oʻqing!
