Tomas Frank Tottenxemdan ketganidan so‘ng ilk bor omma oldida ko‘rinish berishga tayyorlanmoqda. Daniyalik murabbiy 2026-yilgi Jahon chempionati uchun BBC telekanalining ekspertlar guruhiga qo‘shildi. Bu qaror uni yana bir sobiq Tottenxem ustozi Ange Postecoglou bilan televideniye studiyasida raqobatlashishiga sabab bo‘ladi. Bu haqda Goal.com xabar beradi.
Frank va Postecoglou o‘rtasidagi qarama-qarshilik endi yashil maydonda emas, balki efir studiyalarida davom etadi. Postecoglou ITV telekanali bilan shartnoma imzolagan bo‘lsa, Frank BBCning asosiy tahlilchilaridan biri sifatida faoliyat yuritadi. Bu Tomas Frank uchun fevral oyida Tottenxemdan iste’foga chiqarilganidan keyingi ilk jiddiy qadam hisoblanadi.
52 yoshli mutaxassis London klubidagi faoliyati davomida 38 ta o‘yindan atigi 13 tasida g‘alaba qozongan edi. Uning g‘alaba qozonish ko‘rsatkichi klub tarixidagi eng past natija bo‘lib qoldi. O‘z navbatida, Ange Postecoglou ham Nottingem Forestdagi qisqa muddatli va muvaffaqiyatsiz faoliyatidan so‘ng biroz vaqt ko‘zdan nari yurishni ma’qul ko‘rgandi.
Buyuk Britaniyaning yetakchi telekanallari o‘rtasidagi bu kadrlar kurashi muxlislar uchun katta qiziqish uyg‘otmoqda. BBC o‘z jamoasini kuchaytirish maqsadida sobiq Arsenal hujumchisi Olivier Giroudni ham taklif qildi. U Wayne Rooney, Alan Shearer va Joe Hart kabi afsonaviy futbolchilar bilan birga AQSH, Kanada va Meksikada o‘tadigan 48 jamoali turnirni yoritib boradi.
“Zamin”ni Telegramʻda oʻqing!
