Inter Mayami himoyachisi Sergio Reguilon o‘zining sevimli itini Ispaniyadan AQShga olib kelish uchun katta mablag‘ sarflashga qaror qildi. Futbolchi hayvonni oddiy yuk bo‘limida emas, balki shaxsiy samolyotda olib kelishni rejalashtirmoqda, bu esa unga 135 ming dollarga tushadi. Bu haqda Goal.com xabar beradi.
Mashhur bloger TheGrefg bilan suhbatda ispaniyalik futbolchi bu qarorini itining qulayligi bilan izohladi. Uning so‘zlariga ko‘ra, itning uzoq masofali parvozda qiynalishini istamaydi va shuning uchun shaxsiy reys xizmatidan foydalanishni ma’qul ko‘rmoqda.
Eslatib o‘tamiz, yanvar oyida Tottenxemdan erkin agent sifatida Inter Mayami safiga qo‘shilgan Reguilon hozirda jarohatlar sababli maydonga kam tushmoqda. Himoyachi joriy mavsumda atigi to‘rtta o‘yinda ishtirok etib, 175 daqiqa maydonda harakat qildi.
Inter Mayami ayni damda MLS Sharqiy konferensiyasida uchinchi o‘rinni egallab turibdi. Reguilon sog‘ligini tiklab, jamoaning asosiy tarkibidan joy olishni va chempionlik unvonini himoya qilishda o‘z hissasini qo‘shishni maqsad qilgan.
“Zamin”ni Telegramʻda oʻqing!
