Kylian Mbappe'ning orzusidagi Real Madrid klubiga o‘tishi kutilganidek silliq kechmayapti. Fransiyalik hujumchining Ispaniya poytaxtidagi kelajagi borasida turli mish-mishlar tarqalmoqda. Moliya ekspertlarining fikricha, futbolchini sotib olish uchun juda katta mablag‘ talab etiladi va bu bitimni amalga oshirishga dunyodagi sanoqli klublargina qodir. Bu haqda Goal.com xabar beradi.
Moliya bo‘yicha ekspert doktor Rob Wilson'ning ta’kidlashicha, Real Madrid Mbappe'ni qo‘yib yuborishi uchun klub va futbolchi o‘rtasidagi munosabatlar keskin yomonlashishi kerak. Garchi u Madridga erkin agent sifatida kelgan bo‘lsa-da, shartnoma shartlari, imzo bonusi va imidj huquqlarini hisobga olganda, klub unga 300 million yevroga yaqin mablag‘ sarflagan.
Wilson'ning so‘zlariga ko‘ra, Florentino Perez futbolchini sotish uchun Pari Sen-Jermen'ning Neymar uchun to‘lagan 222 million yevrolik rekordidan ham yuqoriroq narx talab qilishi mumkin. Maoshlar va boshqa xarajatlarni qo‘shganda, umumiy transfer paketi 350-400 million yevrodan oshib ketadi. Bu esa uni sotib olishga qodir yagona manzil sifatida Saudiya Arabistonini ko‘rsatmoqda.
Mbappe'ni boshqa yulduzlardan ajratib turadigan jihat uning tijoriy salohiyatidir. Lionel Messi va Cristiano Ronaldo kabi fransiyalik futbolchi ham global brend hisoblanadi. Uning Nike va EA Sports kabi yirik homiylar bilan hamkorligi hamda yosh muxlislar orasidagi ommabopligi uni shunchaki hujumchi emas, balki katta biznes loyihasiga aylantiradi.
“Zamin”ni Telegramʻda oʻqing!
