Myunxenning Bavariya klubi yozgi transfer oynasida tarkibni kuchaytirish maqsadida Entoni Gordon bilan shaxsiy shartnoma bo‘yicha kelishuvga erishdi. Nufuzli jurnalist Ben Jacobsning xabar berishicha, 25 yoshli ingliz futbolchisi Germaniya rekordchisi safiga o‘tishga rozilik bildirgan. Bu haqda Goal.com xabar beradi.
Hozirgi vaqtda asosiy muammo transfer narxida qolmoqda. Nyukasl Yunayted futbolchi uchun 80 million funt sterling (taxminan 92 million yevro) talab qilmoqda, biroq Bavariya bunday katta mablag‘ sarflashni rejalashtirmayapti. Myunxen klubi rahbariyati so‘nggi yillarda moliyaviy tejamkorlik siyosatini olib bormoqda.
Sport direktori Maks Eberl va Kristof Froynd tarkibni faqat zarur pozitsiyalar bo‘yicha kuchaytirish vazifasini olgan. Shunga qaramay, klub prezidenti Uli Xyones ushbu transferni qo‘llab-quvvatlamoqda va tomonlar narxni pasaytirish bo‘yicha muzokaralarni davom ettirmoqda.
Entoni Gordon uchun Myunxen jamoasiga o‘tish yangi chaqiriq sifatida qaralmoqda. Ayniqsa, Maykl Olisening Angliya Premer-ligasidan Bavariyaga o‘tib, tez fursatda yuqori saviyadagi o‘yin ko‘rsatishi futbolchida katta qiziqish uyg‘otgan. Shuningdek, Harri Keyn ham o‘z vatandoshini Germaniya chempionatiga o‘tishga ko‘ndirish uchun harakat qilmoqda.
“Zamin”ni Telegramʻda oʻqing!
