Arsenal va Angliya terma jamoasi yarim himoyachisi Declan Rice ijtimoiy tarmoqlarda ommalashgan “vibe controller” (kayfiyatni boshqaruvchi) memiga munosabat bildirdi. 105 million funt sterling evaziga London klubiga o‘tgan futbolchi nafaqat maydondagi mehnati, balki kiyinish xonasidagi ijobiy muhitni saqlab qolishdagi o‘ziga xos qobiliyati bilan ham muxlislar e’tiborini qozongan. Bu haqda Goal.com xabar beradi.
Vogue nashriga bergan intervyusida Rice jamoa ruhini faqat o‘zi ko‘taradi, degan fikrga qo‘shilmasligini aytdi. “Biz juda yosh va shijoatlimiz, shuning uchun jamoada hamma bir-birini qo‘llab-quvvatlaydi. Men shunchaki quvnoq yigitman, xolos”, — dedi u. Arsenal sobiq futbolchisi Alex Scott esa Declan haqiqiy yetakchi ekanligini va jamoadoshlari unga doimo ishonishini ta’kidladi.
Futbolchilik faoliyatidan tashqari, Rice moda olamida ham o‘z o‘rnini topmoqda. Burberry ijodiy direktori Daniel Lee uni zamonaviy Britaniya futboli va madaniyatining uyg‘unlashuvi sifatida ta’riflaydi. Shunga qaramay, Rice o‘ziga qaratilgan tanqidlarga va ijtimoiy tarmoqlardagi salbiy fikrlarga e’tibor bermaslikni afzal ko‘radi.
Kelajakdagi xalqaro turnirlar haqida gapirar ekan, Rice hozirgi Angliya terma jamoasidagi futbolchilar, jumladan Bukayo Saka, Cole Palmer va Fil Foden o‘rtasidagi chinakam do‘stlik jamoani kuchli qilayotganini qayd etdi. Uning so‘zlariga ko‘ra, aynan shu samimiy munosabatlar jamoaning maydondagi o‘yiniga ijobiy ta’sir ko‘rsatmoqda.
“Zamin”ni Telegramʻda oʻqing!
