Angliya kubogi finali o‘zbekistonlik muxlislar uchun unutilmas kechalardan biri bo‘ldi. “Manchester Siti” Londonning afsonaviy “Uembli” stadionida “Chelsi”ni 1:0 hisobida mag‘lub etib, mavsumdagi ikkinchi sovrinini qo‘lga kiritdi. Mart oyida Angliya liga kubogida zafar quchgan Xosep Gvardiola shogirdlari bu gal mamlakat kubogini ham boshi uzra ko‘tardi.
Ammo finaldan keyingi eng katta muhokamalardan biri yagona gol yoki kubok emas, balki O‘zbekiston milliy terma jamoasi himoyachisi Abduqodir Husanovning o‘yini atrofida bo‘ldi. 22 yoshli markaziy himoyachi bahs davomida “Siti” mudofaasining eng faol va ishonchli futbolchilaridan biriga aylandi.
“Manchester Siti”ning gol o‘tkazmasligida Mark Gexi va Abduqodir Husanovdan iborat markaziy himoya juftligining hissasi katta bo‘ldi. Ular “Chelsi” hujumchilarini ko‘p holatlarda jarima maydoniga yaqinlashtirmadi, xavfli vaziyatlarni vaqtida bartaraf etdi va raqibning tezkor hujumlarini to‘xtatishda muhim rol o‘ynadi.
Statistika ham Husanovning finaldagi faoliyatini tasdiqlaydi. U uchrashuvni bitta muvaffaqiyatli to‘p olib qo‘yish, bitta to‘pni egallab olish va yetti marta to‘pni xavfli hududdan uzoqlashtirish bilan yakunladi. Bu ko‘rsatkich bo‘yicha u Gexi bilan birga o‘yindagi eng yaxshi natijalardan birini qayd etdi.
Biroq aynan Husanovning qattiq va jismoniy kurashga boy o‘yini Angliya muxlislari orasida katta bahslarga sabab bo‘ldi. “Manchester Siti” tarafdorlari uning harakatlarini haqiqiy himoyachilik maktabi, sovuqqonlik va jasorat namunasi sifatida baholagan bo‘lsa, “Chelsi” muxlislari bir necha epizodda penalti berilmaganidan norozi bo‘ldi.
Birinchi bahsli vaziyat birinchi bo‘lim o‘rtalarida sodir bo‘ldi. Joao Pedro “Siti” jarima maydoniga xavfli tarzda yorib kirib borayotgan paytda Husanov unga tanasi bilan qattiq qarshilik ko‘rsatdi. Braziliyalik futbolchi zarba berish uchun qulay pozitsiyaga chiqishga harakat qilayotgandi, ammo Abduqodir uni yo‘ldan to‘xtatdi.
“Chelsi” futbolchilari bu epizodda penalti talab qildi. Biroq bosh hakam Darren Inglend vaziyatni qoidabuzarlik deb baholamadi va o‘yinni davom ettirdi. Shu qarordan keyin ijtimoiy tarmoqlarda fikrlar ikkiga bo‘lindi.
Ayrim muxlislar Husanovning bu harakatini ideal himoyaviy epizod deb atadi. Ularga ko‘ra, o‘zbekistonlik futbolchi kuchli, ammo qoida doirasida harakat qilgan. Boshqalar esa to‘p uchun kurashdan ko‘ra futbolchiga qarshi kontakt ko‘proq bo‘lganini ta’kidlab, penalti berilishi kerak edi, degan fikrda qoldi.
Tanaffus vaqtida bu vaziyat haqida Angliya terma jamoasining sobiq himoyachisi Gari Nevill ham fikr bildirdi. U epizodni “50 ga 50” deb baholadi. Nevillning aytishicha, Husanov Joao Pedroga aniq borib urilgan, ammo bunday holatlarda hakamlar, ayniqsa jarima maydoni ichida, qaror chiqarishda ikkilanishi tabiiy.
Nevill “Chelsi” talandi, deb keskin xulosa qilmadi. Uning fikricha, londonliklarga shunchaki omad kelmagan. Chunki boshqa o‘yinda, boshqa hakam bilan bunday vaziyatda qaror butunlay boshqacha bo‘lishi ham mumkin edi.
Ikkinchi bo‘limda ham Husanov bir necha bor e’tibor markaziga tushdi. 66-daqiqada u yana Joao Pedro bilan kurashga kirishdi. Braziliyalik futbolchi qanotdan uzatilgan to‘pdan keyin zarba berish nuqtasiga chiqishga harakat qilgandi. Ammo bu vaziyatda ikki futbolchi ham jismoniy kurash olib bordi, Pedroning o‘zi ham qo‘lini ishlatgani uchun epizod katta penalti bahsiga aylanmadi.
77-daqiqada esa yana bir keskin holat kuzatildi. Bu safar Husanov jarima maydonida Yorrel Xato bilan to‘qnashdi. Niderlandiyalik futbolchi oldinga o‘tib ketgan, Abduqodir esa uning ortidan kelib kontaktga kirishgandi. “Chelsi” tomoni bu holatni orqadan turtish sifatida baholadi.
Hakam bu vaziyatda ham penalti belgilamadi. Bu qaror ijtimoiy tarmoqlarda yana yangi muhokamalarni boshlab yubordi. “Chelsi” muxlislari Husanov kamida penalti va sariq kartochka bilan jazolanishi kerak edi, deb hisobladi. “Siti” tarafdorlari esa Xatoning yiqilishi haddan tashqari bo‘rttirilganini ta’kidladi.
O‘yindan keyin “Chelsi” murabbiyi Kalum Makfarleyn ham mazkur epizod haqida to‘xtalib o‘tdi. Uning fikricha, Xato va Husanov o‘rtasidagi kontakt penaltiga loyiq bo‘lgan. Murabbiy agar xuddi shunday to‘qnashuv maydonning boshqa qismida sodir bo‘lganida, hakam fol belgilashi mumkin edi, degan fikrni bildirdi.
Shunga qaramay, natija o‘zgarmadi. “Manchester Siti” kubokni qo‘lga kiritdi, Husanov esa finalning eng ko‘p muhokama qilingan futbolchilaridan biriga aylandi. Uning o‘yini bir tomondan himoyadagi jasorat va xarakter namunasi bo‘lsa, ikkinchi tomondan jismoniy kurash chegarasida harakat qilish bo‘yicha katta bahslarga sabab bo‘ldi.
Abduqodir Husanov allaqachon Angliya futbolida qattiq, tezkor va agressiv o‘ynaydigan himoyachi sifatida tanilib bormoqda. U raqibga oson yo‘l bermaydi, duellarda oxirigacha kurashadi va xavfli vaziyatlarda tavakkal qilishdan qo‘rqmaydi.
Eng muhimi, Husanov hozircha o‘zining shiddatli o‘yini bilan jamoasini qiyin ahvolga solib qo‘ymayapti. U qoidabuzarlik va qonuniy jismoniy kurash o‘rtasidagi nozik chiziqni his qilib harakat qilmoqda. Angliya futbolida aynan shunday himoyachilarni yaxshi ko‘rishadi, lekin ular har doim bahslar markazida bo‘ladi.
Bu final Abduqodir uchun katta maktab bo‘ldi. U “Uembli”da, 83 mingdan ziyod muxlis qarshisida, “Chelsi” kabi raqibga qarshi sovrinli o‘yinda asosiy figuralardan biri bo‘ldi. Bu esa uning katta futbolga moslashuvi tez kechayotganini ko‘rsatadi.
Qisqasi, Husanov finalda faqat kubok yutmadi, Angliya futbolida o‘z nomini yanada balandroq eshittirdi. Kimdir uni qahramon dedi, kimdir qoidabuzarlikda aybladi. Ammo bir narsa aniq: Abduqodirni endi Angliyada jiddiy qabul qilishadi. Finaldan keyin uning familiyasi trendga chiqdi — himoyachi uchun bu ham kichik g‘alaba.
“Zamin”ni Telegramʻda oʻqing!
