Manchester Siti va PUMA kompaniyasi 2026-27 yilgi mavsum uchun moʻljallangan yangi liboslar toʻplamini namoyish etdi. "Not Your Typical City" (Siz oʻrgangan odatiy shahar emas) shiori ostida tayyorlangan ushbu kolleksiya anʼanaviy dizayn qoliplaridan voz kechib, klubning doimiy rivojlanish va oʻzgachalikka intilish madaniyatini aks ettiradi. Bu haqda Goal.com xabar beradi.
Yangi uy libosi anʼanaviy bir xil rangli uslubdan voz kechgan holda, oʻziga xos och koʻk rangli gradient (tovlanuvchi) dizaynga ega boʻldi. Yelka qismidagi toʻq rangdan pastki qismdagi oq rangga silliq oʻtuvchi ushbu dizayn klub tarixidagi turli xil osmon rangli liboslar xronologiyasini ifodalaydi. Libos oq yoqa va yenglar, shuningdek, zamonaviylikni taʼkidlovchi kumushrang metallik uslubidagi klub emblemasi bilan boyitilgan. Replikalar narxi 85 funt, original (authentic) versiyasi esa 125 funt etib belgilandi.
Mehmondagi (away) libos esa shaharning ramzi hisoblangan mehnatkash ari (worker bee) motiviga asoslangan. Toʻq qora rangli asos va och sariq rangli elementlar uygʻunligi klubning 1989-90 yillardagi uchinchi libosini yodga soladi. Shuningdek, futbolkaning old qismida ari uyasini eslatuvchi mozaik naqshlar aks etishi kutilmoqda.
Manchester Siti jamoasining uchinchi libosi esa oʻziga xos tarixga ega: u Puma kompaniyasining AI Creator sunʼiy intellekt vositasi yordamida muxlislar oʻrtasida oʻtkazilgan tanlov asosida yaratildi. Muxlislar tomonidan yuborilgan 180 000 ga yaqin dizaynlar orasidan 10 ta finalchi tanlab olindi va gʻolib loyiha professional darajada takomillashtirilib, yakuniy koʻrinishga keltirildi.
“Zamin”ni Telegramʻda oʻqing!
