Roberto De Zerbi Angliya Premer-ligasida jon saqlab qolish vazifasi bajarilganiga qaramay, Tottenxem jamoasining ayanchli mavsumini shafqatsizlarcha tahlil qilishga kirishdi. Italiyalik mutaxassis hozirgi tarkibga nisbatan keskin fikr bildirib, faqat sanoqli oʻyinchilargina klub talablariga javob bera olishini taʼkidladi. Bu haqda Goal.com xabar beradi.
Tottenxem soʻnggi turda Everton ustidan 1:0 hisobida gʻalaba qozonib, Chempionshipga tushib ketish xavfidan qutulib qoldi. Joao Palhinha tomonidan kiritilgan gol jamoaga muhim uch ochkoni taqdim etdi va Spursning elitadagi oʻrnini saqlab qoldi. Biroq, De Zerbi uzoq vaqt bayram qilish niyatida emas.
Brayton sobiq murabbiyi jamoani butunlay qayta qurish loyihasiga eʼtibor qaratmoqda. Uning fikricha, agar klub kelgusi mavsumda ham bunday azobli kunlarni boshdan oʻtkazishni xohlamasa, hozirgi tarkibning katta qismidan voz kechishi kerak. Murabbiy kiyinish xonasidagi futbolchilarning yarmidan koʻpi yozda jamoani tark etishi mumkinligiga ishora qildi.
"Bugun tundan boshlab biz yangi jamoani shakllantirishimiz va tashkil qilishimiz kerak. Menimcha, juda koʻp oʻyinchilarni almashtirishimiz lozim. Tarkibda qolishga loyiq boʻlgan atigi 10, 11 yoki 12 nafar futbolchimiz bor, xolos. Biz tarkibni yuqori saviyadagi ijrochilar bilan toʻldirishimiz shart", — dedi De Zerbi jurnalistlarga.
Italiyalik mutaxassis klub boshqa hech qachon bunday ogʻir vaziyatga tushib qolmasligini taʼminlamoqchi. Mavsumning ikkinchi yarmini turnir jadvalining quyi qismida oʻtkazgan murabbiy rahbariyatdan transferlar boʻyicha faollikni talab qilmoqda. U Tottenxem kabi klub soʻnggi soniyalargacha jon saqlash uchun kurashmasligi kerakligini qatʼiy taʼkidladi.
“Zamin”ni Telegramʻda oʻqing!
