Arsenal bosh murabbiyi Mikel Arteta Chempionlar ligasi finalidagi magʻlubiyatdan soʻng klub rahbariyatini transfer bozorida yanada faol boʻlishga chaqirdi. Garchi London klubi ushbu mavsumda Angliya Premer-ligasida gʻolib chiqqan boʻlsa-da, Budapeshtdagi finalda Pari Sen-Jermen jamoasiga penaltilar seriyasida 4:3 hisobida imkoniyatni boy berdi. Arteta raqib jamoani hozirgi vaqtda "dunyoning eng kuchlisi" deb atadi. Bu haqda Goal.com xabar beradi.
Puskas Arena maydonidagi bahsdan soʻng Arteta yozgi transfer oynasida jiddiy qarorlar qabul qilinishi kerakligini taʼkidladi. Uning fikricha, Yevropa elitasi bilan farqni yoʻqotish uchun klub "juda ambitsiyali, tezkor va aqlli" harakat qilishi lozim. Xabarlarga koʻra, Arsenal hujum chizigʻini kuchaytirish uchun Atletiko Madrid hujumchisi Julian Alvarez nomzodini asosiy maqsad sifatida koʻrib chiqmoqda.
Oʻyin davomida PSJ toʻp nazorati boʻyicha mutlaq ustunlikka ega boʻldi (75,3%). Arteta Luis Enrique jamoasining texnik ustunligini eʼtirof etar ekan, shunday dedi: "PSJni va xususan Luisni tabriklayman, chunki ular mening fikrimcha dunyoning eng yaxshi jamoasi. Ularning toʻp bilan va individual harakatlarda nimalarga qodirligini ilgari koʻrmaganman. Ular bizni oʻzimiz istamagan uslubda oʻynashga majbur qilishdi".
Uchrashuv hakamlik borasidagi bahslardan ham xoli boʻlmadi. Arteta qoʻshimcha boʻlimlarda Nuno Mendes tomonidan Noni Madueke ga nisbatan ishlatilgan qoʻpollik uchun penalti berilmaganidan norozi boʻldi. Murabbiyning soʻzlariga koʻra, bu vaziyat oʻyin taqdirini oʻzgartirishi mumkin edi, biroq hakamning qarori Arsenal zarariga ishladi.
“Zamin”ni Telegramʻda oʻqing!
