Ispaniyaning Mundo Deportivo nashri tarqatgan xabarga koʻra, Barselona klubi Liverpul jamoasining sobiq hujumchisi Darwin Núñez nomzodini koʻrib chiqmoqda. Hozirda Saudiya Arabistonining Al-Hilol klubi bilan shartnomaga ega boʻlgan urugvaylik forvard kutilmaganda kataloniyaliklar radariga tushib qoldi. Bu haqda Goal.com xabar beradi.
Ayni damda Barselona rahbariyati Al-Hilol bilan himoyachi Joao Cancelo transferi boʻyicha muzokaralar olib bormoqda. Maʼlumotlarga koʻra, ushbu muloqotlar davomida Saudiya klubi Darwin Núñez variantini ham taklif qilgan. 26 yoshli hujumchi fevral oyidan beri legionerlar limiti sababli qaydnomadan tashqarida qolib kelmoqda.
Darwin Núñez oʻtgan yozda Liverpul safidan 53 million yevro evaziga Al-Hilolga koʻchib oʻtgan edi. U jamoa safida 24 ta oʻyinda 9 ta gol va 5 ta assist qayd etishga ulgurdi. Biroq, Karim Benzema va boshqa yulduzlar kelishi ortidan u tarkibdan tushib qoldi. Mirror nashrining yozishicha, uning shartnomasi oʻzaro kelishuvga koʻra bekor qilinishi va u erkin agent sifatida Barselona safiga oʻtishi mumkin.
Barselona uchun Darwin Núñez varianti faqatgina Atletiko Madrid hujumchisi Julián Álvarez transferi amalga oshmasa, asosiy rejaga aylanadi. Kataloniyaliklar Robert Lewandowski oʻrniga aynan argentinalik yulduzni olib kelmoqchi, biroq Atletiko Madrid uni 100 million yevrodan kamiga qoʻyib yubormasligini maʼlum qilgan.
Moliyaviy qiyinchiliklarga qaramay, Barselona kelasi mavsum uchun Anthony Gordon transferini hal qilib boʻlgan. Nyukasl Yunayteddan 80 million yevro evaziga sotib olingan ingliz yarim himoyachisi jamoaning hujum salohiyatini oshirishi kutilmoqda. Darwin Núñez masalasi esa yaqin haftalarda oydinlashadi.
“Zamin”ni Telegramʻda oʻqing!
