Urugvaylik hujumchi Darwin Nunez faoliyatida kutilmagan burilish yuz berdi. The Mirror nashrining xabar berishicha, 26 yoshli futbolchi Saudiya Arabistonining Al Hilal klubi bilan shartnomani o‘zaro kelishuvga ko‘ra bekor qilgan. Endilikda u yozgi transfer oynasida erkin agent sifatida istalgan jamoa safiga qo‘shilishi mumkin. Bu haqda Goal.com xabar beradi.
Eslatib o‘tamiz, Nunez o‘tgan yili Liverpul safidan 53 million yevro evaziga Saudiya klubiga o‘tgan edi. Biroq, Al Hilal tarkibidagi legionerlar limitiga oid qoidalar va Karim Benzema jamoaga kelib qo‘shilganidan so‘ng, urugvaylik futbolchining o‘yin amaliyoti keskin kamayib ketdi. U qishki transfer oynasida klub qaydnomasidan chiqarilgandi.
Hozirgi vaqtda Angliya Premer-ligasining Nyukasl Yunayted va Chelsi klublari futbolchining holatini kuzatmoqda. Nunezning Angliyaga qaytish ehtimoli yuqori baholanmoqda, chunki u o‘zining avvalgi darajasini tiklab, terma jamoadagi o‘rnini saqlab qolishni maqsad qilgan.
Darwin Nunez Saudiya chempionatida 22 ta o‘yinda maydonga tushib, 9 ta gol va 5 ta golli uzatmaga mualliflik qilgan. Biroq, fevral oyidan buyon rasmiy o‘yinlarda ishtirok etmagani uning jismoniy holatiga ta’sir ko‘rsatishi mumkin. Hujumchi yaqinlashib kelayotgan yozgi musobaqalarda o‘zini ko‘rsatish uchun yangi jamoa topishga intilmoqda.
“Zamin”ni Telegramʻda oʻqing!
