Portugaliya — O‘zbekiston o‘yini turning eng tomoshabop bahslari qatoriga kirdi

2026 yilgi jahon chempionati guruh bosqichi ikkinchi turidan o‘rin olgan Portugaliya va O‘zbekiston terma jamoalari o‘rtasidagi uchrashuv tomoshabinlar soni bo‘yicha turning eng ommaviy o‘yinlari o‘ntaligiga kirdi.

Xyuston shahridagi «NRG Stadium» arenasida o‘tkazilgan bellashuvni 68 777 nafar muxlis bevosita stadion tribunalaridan kuzatdi. Bu natija Portugaliya — O‘zbekiston uchrashuviga ikkinchi turning eng ko‘p tomoshabin to‘plagan bahslari ro‘yxatida yettinchi o‘rinni olib berdi.

Ikkinchi turda eng katta auditoriya Norvegiya va Senegal terma jamoalari o‘rtasidagi o‘yinda qayd etildi. Ushbu bahsni 80 663 nafar muxlis stadiondan tomosha qildi.

Shuningdek, Argentina — Avstriya uchrashuviga 70 649 nafar, Belgiya — Eron bahsiga esa 70 317 nafar tomoshabin tashrif buyurdi.

JCH-2026 ikkinchi turida eng ko‘p muxlis yig‘gan 10 ta o‘yin:

1. Norvegiya — Senegal — 80 663 nafar

2. Argentina — Avstriya — 70 649 nafar

3. Belgiya — Eron — 70 317 nafar

4. Shveysariya — Bosniya va Gersegovina — 70 026 nafar

5. Turkiya — Paragvay — 68 827 nafar

6. Niderlandiya — Shvetsiya — 68 777 nafar

7. Portugaliya — O‘zbekiston — 68 777 nafar

8. Ekvador — Kyurasao — 68 598 nafar

9. Iordaniya — Aljir — 68 371 nafar

10. Braziliya — Gaiti — 68 324 nafar

Eslatib o‘tamiz, Portugaliya va O‘zbekiston terma jamoalari o‘rtasidagi uchrashuv yevropaliklarning 5:0 hisobidagi g‘alabasi bilan yakunlangan edi.

Portugaliya safida Krishtianu Ronaldu dubl qayd etdi. Nunu Mendesh va Rafael Leau ham bittadan gol urishdi. Yana bir to‘p O‘zbekiston terma jamoasi darvozaboni Abduvohid Ne’matovning avtogoli sifatida qayd etildi.