Ronaldu – Yilning eng yaxshi futbolchisi, Zidan – eng yaxshi murabbiy, «Real» – eng yaxshi klub

Yevropa klublari assotsiatsiyasi va Yevropa futbol agentlari assotsiatsiyasi ta’sis etgan Globe Soccer Awards 2017 marosimi BAAning Dubay shahrida bo‘lib o‘tdi.

Unga ko‘ra «Real» va Portugaliya terma jamoasi hujumchisi Krishtianu Ronaldu «Yilning eng yaxshi futbolchisi» nomiga sazovor bo‘ldi.

Madridliklar ustozi Ziyedin Zidan 2017 yilning eng yaxshi murabbiyi deb topilgan bo‘lsa, «Real» o‘tgan yilning eng yaxshi klubiga aylandi. Ispaniya Primerasi esa yilning eng yaxshi ligasi nomiga sazovor bo‘ldi.


Yilning eng yaxshi agenti deb portugaliyalik vositachi Jorje Mendesh topildi. Germaniyalik Feliks Brix esa eng yaxshi hakam nomiga erishdi.

«Monako» klubi vitse-prezidenti Vadim Vasilev eng yaxshi rahbar nomiga loyiq ko‘rildi.

Misr terma jamoasi bosh murabbiyi Ektor Kuper arab davlatlari terma jamoa murabbiylari ichida tengsiz deb topildi. Saudiya Arabistoni esa eng yaxshi arab terma jamoasi nomiga loyiq ko‘rildi.


Shuningdek, Karles Puyol va Franchesko Totti «Futbolchilik faoliyati uchun» nomli sovringga ega chiqqan bo‘lishsa, «Murabbiylik faoliyati uchun» nomli sovrin esa Marchello Lippiga topshirildi.



Manba: www.uff.uz “Zamin” yangiliklarini “Twitter”da kuzatib boring