22:18 / 17.01.2016
6 781

Afsonaviy bokschi Muhammad Ali bugun 74 yoshga to‘ldi

Afsonaviy bokschi Muhammad Ali bugun 74 yoshga to‘ldi
Asl ismi sharifi Kassius Kley, musulmon dinini qabul qilganidan keyin Muhammad Aliga aylangan afsonaviy bokschi bugun 74 yoshga to‘ldi. Bu haqda Kun.uz xabar bermoqda.

U 1942 yilning 17 yanvar kuni AQShning Kentukki shtati Luisvill shahrida dunyoga kelgan.

Hayotini boks bilan bog‘lagan Muhammad Ali yarim og‘ir vazn toifasida 1960 yilgi XVII Yozgi Olimpiya o‘yinlarida chempionlik shoxsupasiga ko‘tarilgan. Supero og‘ir vazn toifasida mutloq jahon chempioni (1964—1966, 1974—1978) bo‘lgan. Besh karra “Yil bokschisi” (1963, 1972, 1974, 1975, 1978) hamda 10 yillikning “Eng yaxshi bokschisi” deya e’tirof etilgan.

Butun dunyoga Muhammad Ali nomi bilan tanilgan Kassius Marsellus Kley doimo jurnalistlar qurshovida bo‘lsa-da, uning hayotidagi ayrim voqealarni juda kamdan-kam insonlar bilishgan. Ana shunday insonlardan biri uning do‘sti, “Life” jurnalining ilk qora tanli suratkashi Gordon Parks bo‘lgan. Alining ko‘plab suratlarini aynan Parks olgan. Afsonaviy bokschining 60-yillar o‘rtalari va 1971 yilgacha bo‘lgan faoliyati davomida olingan ayrim suratlar bilan tanishing.

Kassius Kley va Gordon Parksning tanishuvi 60-yillar o‘rtalarida, bokschi Rimdagi Olimpiada o‘yinlarida g‘alabaga erishganidan so‘ng amaldagi chempionlarning unvonlariga ko‘z tika boshlagan paytda yuz bergan. Bo‘lajak afsonaviy sportchi Parksning qora tanli bo‘lsa-da, yuqori mavqega erisha olgani va oddiy oiladan ekanligi bois u bilan do‘st tutingan.

Alining boks bilan shug‘ullana boshlashiga mahalliy sport to‘garagida suratga olingan filmni ko‘rgach, televizorda chiqishni va suratlari jurnallarda bosilishini xohlashi sabab bo‘lgan.

Gordon Parks Muhammad Ali yuksak cho‘qqiga erishish uchun nimalardan voz kechganini ham ko‘rsatib bera olgan. Alining tinimsiz mashg‘ulotlari, zararli odatlardan butunlay voz kechishi va sog‘lom ovqatlanish tarziga qat’iy rioya qilishi – bularning bari bokschining hurmatga sazovor bo‘lishiga olib kelgan.

Vetnamda harbiy xizmatni o‘tashdan bosh tortgach, Kassius Kley bir zumda barcha chempionlik unvonlaridan ajraldi, shuningdek, uch yil davomida boks janglarida qatnashish imkoniyatidan ham mahrum etildi. Kassiusning urushga borishdan bosh tortishiga sabab, uning insonlarni o‘ldirishni taqiqlovchi din — Islomni qabul qilganligi edi.

Islom dinini qabul qilgach, Kassiusga dastlab Iks familiyasini berishdi. Keyinchalik esa unga tantanali ravishda Muhammad Ali ismi berildi.

Professional sportdan uch yil uzoqda yurgan Ali reklama va sport loyihalarida ishtirok etish orqali uch million dollarga yaqin pul ishladi. Bu davr mobaynida sportchi va uning agentlari Muhammad Alining professional ringga qaytishi uchun imkoniyat izlashdi.

Bir marta u haydovchilik guvohnomasi mos kelmaydigan avtomobilni boshqargani uchun bir haftaga qamoq jazosiga mahkum etildi. Muhammad Ali o‘z avtobiografiyasida bu davrni hayotining eng yoqimsiz davri deb ataydi.

Alining katta sportga qaytishi professional faoliyatidagi ilk mag‘lubiyat bilan boshlandi. “Asr jangi” deb atalgan bellashuvda u Jo Freyzerdan mag‘lubiyatga uchradi. Revansh jangidagi Freyzer ustidan qozonilgan g‘alaba va yosh Formandan chempionlik unvonini qaytarib olish imkoniyati Muhammad Aliga kuch bag‘ishladi va u boshlagan ishini nihoyasiga etkazib, barchaning yoqimtoyiga aylandi.

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Sport » Afsonaviy bokschi Muhammad Ali bugun 74 yoshga to‘ldi
[/banner_pushhouse