Rossiya va Belarus xokkey, basketbol hamda gandbol boʻyicha xalqaro musobaqalardan chetlatildi

Rossiya va Belarus terma jamoalari xokkey boʻyicha xalqaro turnirlardan chetlashtirildi. Bu haqda Xalqaro xokkey federatsiyasi (IIHF) saytida xabar qilindi.

Qayd etilishicha, bu qaror «keyingi ogohlantirishgacha» qabul qilingan. Hozircha IIHF Rossiya va Belarusning sentyabr oyigacha boʻlgan barcha musobaqalarni oʻtkazib yuborishini ma'lum qildi.

Shu tariqa Rossiya Finlyandiyada boʻlib oʻtadigan kattalar oʻrtasidagi 2022 yilgi jahon chempionatida ishtirok etmaydi va oʻsmirlar oʻrtasidagi jahon chempionatini, ayollar oʻrtasidagi jahon chempionatini, shuningdek, avgust oyida boʻlib oʻtishi kerak boʻlgan yoshlar oʻrtasidagi jahon chempionatini oʻtkazib yuboradi.

Shuningdek, Rossiya dekabr oyining oxirida Novosibirsk va Omskda boshlanishi kerak boʻlgan yoshlar oʻrtasidagi jahon chempionatini oʻtkazish huquqidan mahrum qilindi. IIHF kelgusi oylarda musobaqani oʻtkazish uchun yangi joy boʻyicha muzokaralarni boshlaydi.

Shuningdek, Evroliga Ijroiya kengashi ham 28 fevral kuni Ukrainadagi vaziyat boʻyicha qabul qilingan qarorlari e'lon qilindi. Unga koʻra, Rossiya basketbol jamoalarining Evroliga (SSKA, UNIKS, «Zenit») va Evrokubokdagi («Lokomotiv-Kuban») ishtirokini toʻxtatishga qaror qilingan.

Bundan tashqari, Evropa gandbol federatsiyasi (EHF) ham Rossiya va Belarus jamoalari hamda klublariga tashkilot shafeligidagi musobaqalarda qatnashish huquqidan mahrum qildi. Bu haqda EHF matbuot xizmati xabar berdi.

Qaror tashkilot ijroiya qoʻmitasining navbatdan tashqari yigʻilishida qabul qilingan va klublar hamda jamoalar darajasidagi barcha musobaqalarga taalluqlidir.

Eslatib oʻtamiz, avvalroq FIFA va UEFA Rossiya futbol terma jamoalari hamda klublarini xalqaro musobaqalardan chetlatgandi. “Zamin” yangiliklarini “Telegram”da kuzatib boring