Ba’zan Mourinoni o‘ldirib qo‘ygim kelardi!

Ayni paytda “Vilyarreal” sharafini himoya qilayotgan Serj Ore “Tottenxem”da Joze Mourino qo‘l ostida o‘ynagan davrlarni emga oldi. Ivuarlik himoyachi o‘ziga xos xarakterga ega bo‘lgan portugaliyalik mutaxassis bilan til topishish usuli bilan o‘rtoqlashdi.

- Bir marta biz jiddiy tortishib qoldik. Bu taktik qarashlar sababli yuzaga kelgan tortishuv edi. Men Mourinoning qarorlaridan norozi edim va buni aytish uchun xonasiga bordim.

Men muammosiz u bilan gaplashib olishim mumkinligini bilardim. Chunki unga o‘yinchilarning rostgo‘yligi yoqardi. Ertasiga o‘rtamizdagi mojaro barham topdi. Mourino o‘yinchini eshitadi va keyin o‘z fikrini aytadi. Bu menga yoqardi.

Ba’zan Mourinodan shu darajada nafratlanib ketasanki, uni o‘ldirib qo‘yishga tayyor turasan. Lekin keyinchalik uni tushuna boshlaganingdan keyin yaxshi ko‘rib qolasan. Bu uning xarakteri bilan bog‘liq. Chunki u tug‘ma g‘olib. Hozir Jozega hech qanday e’tirozim yo‘q, - dedi Serj Ore.

29 yoshli futbolchi faoliyatining katta qismini Fransiya chempionatida “Lans”, “Tuluza” va “Pari Sen-Jermen” klublarida o‘tkazgan. 2017-2021 yillar davomida “Tottenxem”da to‘p surgan. O‘tgan yili yozda Ispaniya chempionati vakili “Vilyarreal” safiga ko‘chib o‘tdi. Joriy mavsumda tajribali himoyachi 15 ta uchrashuvda qatnashdi.

Ore 2013 yildan beri Kot-d’Ivuar terma jamoasi a’zosi hisoblanadi. Mamlakati bosh jamoasi safida 69 ta uchrashuvda uchta gol urgan futbolchi 2015 yilda Afrika chempioni bo‘lgan.

Mourino kelasi mavsum uchun uch futbolchi tanladi

“Roma” sport direktori Tyagu Pinto bosh murabbiy Joze Mourino topshirig‘iga ko‘ra, kelasi mavsum uchun futbolchi qidirmoqda.

Ayni paytda uning qo‘lida portugaliyalik bosh murabbiy tanlagan uch futbolchi nomi kiritilgan ro‘yxat bor. Tyagu Pinto yozda ularni Rimga kelishga ko‘ndirishi kerak.

Asosiy nishon sifatida “Feyenoord”da o‘ynayotgan argentinalik Markos Senesi belgilangan. Bu himoyachi joriy mavsumda Niderlandiya chempionatida 28 ta uchrashuvda ikkita gol urdi.

Fransiya chempionatida “Lill” sharafini himoya qilayotgan yarim himoyachi Sheka ham Mourino nazariga tushgan. 27 yoshli futbolchi chempionatda 23 ta bahsda qatnashib, raqiblar darvozasini uch bor ishg‘ol qildi.

Shuningdek, Mourino jamoa hujumini kuchaytirish maqsadida “Valensiya”dagi yurtdoshi Gonsalu Gedeshni “Roma”ga olib kelishni istayapti. Portugaliyalik hujumkor futbolchi ispan klubining asosiy o‘yinchilaridan hisoblanadi.

Gedesh bu mavsum jamoadoshlari orasida Ispaniya chempionatida eng ko‘p – 31 ta uchrashuvda maydonga tushdi. Uning hisobida 11 ta gol bor.

Nikolo Dzanolo: Mourino sovrin olib beradi

“Roma”ning hujumkor futbolchisi Nikolo Dzanolo Joze Mourino qo‘l ostida jamoa sovrin yuta olishiga ishonayotganini bildirdi.

- Mourino dunyodagi eng zo‘r murabbiylardan biri. U bizni hech qachon taslim bo‘lmaslikka, har doim hushyor turish, hamma narsaga tayyor bo‘lish, maqsadga erishish uchun birlashishga o‘rgatdi. Men Mourino bilan birga biror sovrin qo‘lga kiritishimizga ishonaman.

Birinchi marta uchrashgan kunimizdanoq umumiy ishimiz yuzasidan darror bir-birimizni tushuna oldik. Biz shu mavsumning o‘zida sovrin yutmoqchimiz. Qanday g‘alaba qozonishni biladigan murabbiy bilan imkoniyatlarimiz ancha oshadi.

Konferensiyalar ligasi yarim finalidagi raqibimiz “Lester” juda kuchli jamoa. Har qanday Angliya jamoasi kabi ular jismonan baquvvat va ko‘p yuguradi. Biz ham kam emasmiz. Mavsum davomida har qanday raqib bilan raqobatlashishga tayyor ekanimizni bir necha bor isbotladik. Biz qo‘rqmaymiz va o‘z usulimizda o‘ynaymiz, - dedi NikoloDzanolo.

22 yoshli futbolchi klub rahbariyati bilan yangi shartnoma bo‘yicha muzokaralarni davom ettirmoqda. Dzanologa Italiya va Angliyaning grand klublaridan takliflar bo‘lyapti. Rim klubi agar 50 million yevro tikadigan jamoa bo‘lsa, rahbariyat Nikoloning ketishiga to‘sqinlik qilmasligini bildirgan. “Zamin” yangiliklarini “Instagram”da kuzatib boring