20:30 / 24.08.2024

iPhone 16 smartfonidan qanday yangiliklar kutilmoqda?

^{Foto: Apple Hub}
Tez orada Apple kompaniyasi oʻzining yangi smartfonini taqdim etadi. Insayderlarga koʻra, namoyish 10 sentyabr kuni boʻlib oʻtadi. Apple’ning yangi iPhone 16 smartfonlariga qanday oʻzgarishlar kiritilgan? Quyida batafsil koʻrib chiqamiz.

Joriy yilda chiqishi kutilayotgan smartfonlar dizaynida deyarli oʻzgarishlar yoʻq. Garchi oʻtgan yilgi iPhone 15 Pro birinchi marta titan korpusda chiqqan boʻlsa-da, bu yilgi iPhone 16 liniyasi avvalgi dizaynda ishlab chiqariladi.

^{Foto: Forbes}
Yangi iPhone 16, 16 Plus smartfonlarida kamera bloki endilikda oval shaklida boʻladi. Biroq, 16 Pro va 16 Pro Max kabi modellarda kamera dizayni oʻzgarmay qoladi.

Joriy yilgi liniyaga yangi rang — Desert Titanium kiritilishi taxmin qilinmoqda. Bundan tashqari, iPhone ixlosmandlari smartfonning oq, qora, sariq, havorang va pushti variantlarni xarid qilishlari mumkin.

^{Foto: Forbes}
Gadjet ekranlari ham kattalashadi. Odatiy iPhone 16 diagonali uzunligi 6,3 dyuymni, premium versiyasi esa 6,9 dyuymni tashkil qiladi.

iPhone tugmasida ham oʻzgarishlar bor: uning funktsional imkoniyatlari kengaytiriladi va tugmaga Atlas nomi beriladi.

^{Foto: Europa Plus}
Kameralarga kelsak, texnik jihatdan yanada takomillashtirilgan iPhone kameralarida olingan suratlar yanada sifatliroq boʻladi. Ayniqsa, qorongʻi joyda olingan tasvirlar yaqqolroq koʻrinadi.

^{Foto: Europa Plus}
Smartfon xotirasi asosiy konfiguratsiyada 128 GB, Pro versiyasida 2 TB gacha boradi. Bundan tashqari, barcha iPhone 16 gadjetlari 8 GB operativ xotira bilan ta'minlanadi. Bu sun'iy intellekt toʻplami — Apple Intelligence ishlashi uchun zarur boʻlgan hajmdir. Shuningdek, iPhone 16 seriyaning barcha modellarida avtonomlik ham oshadi. Qurilmaning oʻlchami taxminan 160x76x8 millimetr boʻladi.