Yaqin yillarda Apple’dan qanday mahsulotlarni kutish mumkin?

Bloomberg’ning taniqli insayderi Mark Gurman Apple ikkita mutlaqo yangi qurilmani tayyorlayotganini aytdi: aqlli koʻzoynaklar hamda kameralar oʻrnatilgan birinchi AirPods quloqchinlari. Tahlilchining fikricha, kompaniya qurilmalarni 2027 yilgacha taqdim etishi mumkin.

Hisobotga koʻra, Apple Vision Pro AR garniturasi sotuvidan kompaniyaning koʻngli toʻlmagan. Bosha kiyiladigan qurilma juda murakkab, noqulay, qimmat va koʻpchilik uchun foydasiz boʻlib chiqdi. Shunday boʻlsa-da, korporatsiyada AR sohasidagi koʻplab texnologiyalar va ishlanmalar saqlanib qolgan. Apple ularni yanada oddiy va ixchamroq qurilmada qoʻllashi kutilmoqda.

Gurmanning ta'kidlashicha, “olmachilar” klassik aksessuarga oʻxshash smart koʻzoynak ishlab chiqmoqda. Ular 2023 yilda chiqarilgan Ray-ban Meta Smart Glasses’ni eslatishi mumkin.

Apple’ning aqlli koʻzoynagi kameralar, mikrofonlar va dinamiklar bilan jihozlanadi. Linzalar kunduzgi yorugʻlikda quyoshdan himoyalovchi koʻzoynakka aylanib, atrof-muhitga moslashishi mumkin. Shuningdek, koʻzaynak Siri’ni qoʻllab-quvvatlashi ehtimoli bor. Mini-proektor esa foydalanuvchining koʻz oldida ob-havo ma'lumotlari, rejalashtiruvchi, yoʻl koʻrsatuvchi va boshqa shu kabi axborot vidjetlarini aks ettira oladi. Eslatib oʻtamiz, Meta oʻzining aqlli koʻzoynagini 299 dollarga sotmoqda. Apple ham oʻz mahsulotini xuddi shunday arzon narxda taklif qilishi ehtimoldan xoli emas.

2027 yilgacha kutilayotgan yana bir qiziqarli qurilma — tashqariga yoʻnaltirilgan kameralari bor birinchi simsiz AirPods quloqchinlari. Balki modelga AirPods Pro 3 yoki 4 deb nom berilar. Quloqchinlar atrofdagi muhitni oʻqiy olishi mumkin, bu ayniqsa koʻrish qobiliyati cheklangan odamlar uchun juda foydali boʻladi. Hozircha garnituralar uchun kameralarning boshqa maqsadlari noma'lum. Apple ularni Apple Intelligence sun'iy intellekt funktsiyalari bilan qandaydir tarzda bogʻlash ehtimoli mavjud.

Insayderning aytishicha, Apple hozircha vizual intellekt funktsiyalarini joriy etish uchun qurilmaning shakl-shamoyili ustida tajribalar oʻtkazmoqda. Shu sababli, quloqchinlarning funktsiyalari haqida gapirishga hali erta. “Zamin” yangiliklarini “Telegram”da kuzatib boring