Crocodilus: Android qurilmalariga xavf solayotgan yangi bank troyani

Kiberxavfsizlik sohasidagi mutaxassislar Android operatsion tizimida ishlovchi smartfon va planshetlar uchun jiddiy xavf tug‘dirayotgan yangi virus haqida ogohlantirishdi. Yangi aniqlangan virus — Crocodilus deb nomlanadi va u bank troyan turiga mansub bo‘lib, moliyaviy ma’lumotlarni o‘g‘irlashga ixtisoslashgan.

Virus qanday tarqalmoqda?

Dastlab Crocodilus o‘zini Google Chrome singari ishonchli va ommaviy ilovalar ko‘rinishida namoyon etadi. Ammo u foydalanuvchi qurilmasiga o‘rnatilgandan so‘ng, faol ravishda kriptovalyuta hamyonlari, onlayn-banking tizimlari va parol saqlovchi ilovalar orqali shaxsiy ma’lumotlarni yig‘ishni boshlaydi.

Uning zararli faoliyati shunchaki ma’lumotlarni o‘g‘irlash bilan cheklanmaydi. Virus qurilmada “Bank qo‘llab-quvvatlash xizmati” degan nom bilan soxta kontakt qo‘shadi. Shu orqali firibgarlar foydalanuvchiga qo‘ng‘iroq qilib, u bilan “rasmiy” bank xodimi sifatida muloqotga kirishadi va ma’lumotlarni o‘zlashtirishga harakat qiladi.

Geografik tarqalishi kengaymoqda

Crocodilus virusi allaqachon bir nechta davlatlarda qayd etilgan. Ular qatoriga:
- Turkiya
- Ispaniya
- Polsha
- Argentina
- Braziliya
- Hindiston
- Indoneziya
- AQSH
kiradi va xavf hududining yanada kengayishi kutilmoqda.

Soxta reklama va havolalar orqali tarqalish

Crocodilus virusi Facebook kabi ijtimoiy tarmoqlarda tarqatilayotgan soxta reklamalar orqali ham faol ilgarilanmoqda. Foydalanuvchilarga “sovg‘alar”, “ishonchli dasturlar” va “foydali xizmatlar” niqobida zararli havolalar yuboriladi. Shu orqali virus qurilmaga joylashadi va faoliyatini boshlaydi.

Mutaxassislardan muhim tavsiyalar

Kiberxavfsizlik ekspertlari foydalanuvchilarga quyidagi eng muhim ehtiyot choralarini ko‘rishni maslahat berishmoqda:

- Notanish va shubhali havolalarni ochmang;
- Rasmiy Play Market orqaligina ilovalarni yuklab oling;
- Smartfonda keraksiz ruxsatlarni cheklang;
- Kuzatuv ostida bo‘lgan ilovalarni muntazam tekshirib boring;
- Antivirus dasturlaridan foydalaning.

Crocodilus virusi — bu nafaqat shaxsiy ma’lumotlar, balki moliyaviy xavfsizlik uchun ham jiddiy tahdiddir. Uning murakkab mexanizmi va soxta qo‘ng‘iroqlar orqali ishlaydigan sxemasi foydalanuvchilarni yolg‘onga ishontirish va aldashda samarali ishlamoqda.

Diqqatli bo‘ling, har bir havola va qo‘ng‘iroq ortida xavf yotish mumkin!
Internetda xavfsizlik — bu faqat qurilmaning emas, balki ongingizning himoyasi hamdir. “Zamin”ni Telegramʻda oʻqing!