Germaniya mudofaa sanoatida yangi bosqich boshlandi — mamlakat chuqur zarba bera oladigan, operatorning to‘g‘ridan to‘g‘ri aralashuvisiz nishonlarga aniq zarba yo‘llay oladigan avtonom “kamikadze” dronlarini ishlab chiqish uchun milliard dollarlik yirik tanlovni boshladi, deb xabar berdi nemis ommaviy axborot vositalari.
Bu turdagi zamonaviy uchuvchisiz uchish apparatlari minglab kilometr masofani bosib o‘tish, dushman mudofaasini mustaqil ravishda yo‘q qilish va manzilga tez yetib borish imkoniyatiga ega bo‘ladi. Ushbu tizimlar an’anaviy ballistik va qanotli raketalarni to‘ldirishi, Bundesverga strategik masofada zarba berish imkoniyatlarini kengaytirishi kutilmoqda.
Ma’lumotlarga ko‘ra, federal hukumat Germaniyaning yetakchi mudofaa konsernlari va innovatsion startaplariga texnik talablar ro‘yxatini allaqachon yuborgan. Loyiha doirasida bir necha kompaniyalardan iborat konsorsiumlar raqobatga kirishgan.
Dastlabki bosqichda kamida uchta konsorsium ishtirok etishi, 2029 yilga qadar birinchi namunaviy dronlarni yetkazib berish kutilmoqda. Bu Germaniya mudofaa salohiyatini sezilarli darajada kuchaytirishi va mamlakatni uchuvchisiz texnologiyalar sohasida Yevropa lideriga aylantirishi mumkin.
Mutaxassislar va harbiy tahlilchilar yangi dron tizimi Germaniya armiyasi uchun strategik ustunlik berishi, milliy xavfsizlikni mustahkamlashda hal qiluvchi ahamiyat kasb etishini ta’kidlamoqda. Yaqin yillarda loyihaning rivoji va amaliy natijalari katta qiziqish bilan kuzatilmoqda.
