Bluesky ijtimoiy tarmog‘i Missisipi shtatida xizmat ko‘rsatishni to‘xtatdi, deb TechCrunch xabar berdi. Bu qaror yangi yosh aniqlash qonuniga rioya qilmaslik yo‘lini tanlagani uchun qabul qilindi.
Kompaniya juma kuni blogida e’lon qilgan xabarga ko‘ra, kichik jamoa bo‘lganligi sababli bu turdagi qonun talab qiladigan texnik o‘zgarishlarni amalga oshirish imkoniyatiga ega emas. Qonunning keng doirasi va shaxsiy daxlsizlikka ta’siri ham tanqid qilindi.
Missisipining HB 1126 qonuni barcha foydalanuvchilardan yoshini tasdiqlashni talab qiladi. 18 yoshgacha bo‘lganlar uchun ota-onaning roziligi ham kerak bo‘ladi. Qonunga bo‘ysunmaslik holatida har bir foydalanuvchi uchun 10 000 dollargacha jarima belgilanadi.
Bluesky bu qonun faqat bolalarni himoya qilish emas, balki so‘z erkinligini ham cheklab, kichik platformalar va texnologik innovatsiyalarga zarar yetkazadi, deb hisoblaydi.
Qonunga amal qilish uchun Bluesky barcha foydalanuvchilarning shaxsiy ma’lumotlarini yig‘ib, ularni saqlashi kerak bo‘ladi. Bu Britaniyadagi OSA qonunidan farq qiladi — u faqat muayyan kontent uchun yosh tekshiruvini talab qiladi.
Bundan tashqari, Missisipi tashqarisidagi ayrim foydalanuvchilar ham platformaga kira olmayapti. Sababi, ularning mobil operatorlari tarmoq trafikini Missisipi orqali yo‘naltirmoqda.
Kompaniya ma’lumotiga ko‘ra, bu qaror faqat Bluesky ilovasiga tegishli. AT Protocol asosida qurilgan boshqa ilovalar bu masalaga boshqacha yondashishi mumkin.
“Zamin”ni Telegramʻda oʻqing!
