Toshkent viloyatining Bo‘stonliq tumanida quvvati 20 megavatt bo‘lgan «Chorvoq shamol elektr stansiyasi» (SHES) qurilishi boshlandi, deb xabar berdi Energetika vazirligi.
Loyiha 2026 yilda to‘liq ishga tushirilishi rejalashtirilgan. Stansiya faoliyat boshlagach, yiliga o‘rtacha 50 million kilovatt/soat elektr energiyasi ishlab chiqaradi. Buning natijasida 15 million kub metr tabiiy gaz tejaladi va atmosferaga chiqadigan 22 ming tonna zararli moddaning oldi olinadi.
SHES orqali qariyb 20 ming xonadonni barqaror elektr bilan ta’minlash imkoniyati yaratiladi.
Mutasaddilarning ta’kidlashicha, bu loyiha nafaqat mintaqada energiya xavfsizligini oshiradi, balki ekologik barqarorlikni ham ta’minlaydi. Bo‘stonliq shamol stansiyasi yaqin yillarda mamlakatdagi eng zamonaviy «yashil energiya» obyektlaridan biriga aylanishi kutilmoqda.
Mehmon guruhidagi foydalanuvchilar ushbu nashrga izoh qoldira olmaydi.
