Nintendo Switch 2 uchun yaqinda e'lon qilingan GRID Legends versiyasi “yaqin orada” chiqishi kutilmoqda. Aniq sana hozircha aytilmadi, biroq Feral Interactive jamoasi Redditdagi muxlislar bilan muloqotda o'yinning texnik tomonlariga doir ayrim tafsilotlarni ochiqladi. Bu haqda playground.ru xabar beradi.
Ishlab chiquvchilarga ko'ra, GRID Legends’da dok-stansiya va portativ rejimlarda “Grafika” hamda “Unumdorlik” sozlamalari bo'ladi: mos ravishda 30 fps va 60 fps gacha. Portativ rejimning o'zida esa qo'shimcha “Muvozanatli” va “Batareya tejash” presetlari ham taqdim etilib, o'yinchi kadrlar tezligi va tasvir sifati orasida o'zi uchun qulay kombinatsiyani tanlay oladi.
Grafik effektlar borasida ham chekinish yo'q: Switch 2 talqinida mobil versiyalar va boshqa konsollarda ko'rilgan tomoshabop unsurlar saqlanadi. Shinalardan chiqqan tutun, uchqunlar, chiqarish quvuridan otilgan alanga chaqnashlari va yana boshqa ko'plab effektlar o'yinda qoladi.
Shuningdek, GRID Legends Nintendo Switch Online orqali taqdim etiladigan GameCube kontrolleri variantini ham qo'llab-quvvatlaydi. Analog trigerlar gaz berish va tormoz uchun ishlashi aytilmoqda — Feral Interactive bularning “hammasi sinovdan o'tkazilib, tekshirilganini” ta'kidlagan.
