2025 yil yanvar oyida uchirilgan Falcon 9 raketasining yuqori qismi joriy yilning 5 avgust kuni Oy sirtiga qulaydi. Astronomlarning hisob-kitoblariga ko'ra, to'qnashuv gipertovush tezligida sodir bo'ladi. Bu haqda Ixbt.com xabar beradi.
Uzunligi qariyb 13,8 metr va massasi 4 tonna bo'lgan ushbu obyekt Yer atmosferasida yonib ketmagan. U cho'ziq orbita bo'ylab harakatlanib, asta-sekin Oyga yaqinlashgan va endi uning sirtiga tushishi muqarrar.
Orbitadagi dinamika bo'yicha mutaxassis Bill Greyning ma'lum qilishicha, raketa qismi Oyga soniyasiga 2,43 kilometr tezlikda uriladi. Bu ko'rsatkich tovush tezligidan qariyb yetti baravar yuqori hisoblanadi.
To'qnashuv Oyning ko'rinadigan qismidagi Eynshteyn krateri hududida yuz berishi kutilmoqda. Oyda atmosfera yo'qligi sababli, obyekt sirtga butun holatda yetib boradi va kichik krater hosil qiladi.
Mutaxassislarning ta'kidlashicha, bu holat kelajakdagi kosmik missiyalar uchun xavf tug'dirmaydi.
Kosmik fazoda chiqindilar ko'payib borayotgani sababli, kelajakda bunday holatlar tez-tez takrorlanishi mumkin. Bunga yo'l qo'ymaslik uchun raketa qismlarini Quyosh atrofidagi xavfsiz orbitalarga yo'naltirish amaliyoti joriy etilishi rejalashtirilmoqda.
“Zamin”ni Telegramʻda oʻqing!
