Oʻzini oʻzi boshqaruvchi yuk mashinalari ishlab chiqaruvchi Kodiak AI startapi 100 million dollar miqdorida sarmoya jalb qilganini eʼlon qildi. Biroq, kompaniya oʻz aksiyalarini bozor narxidan sezilarli darajada past — har bir aksiya uchun 6,50 dollar qiymatida sotuvga chiqargani investorlarning noroziligiga sabab boʻldi. Natijada, kompaniya aksiyalari birja yopilgandan soʻng 37 foizga arzonlashdi. Bu haqda Techcrunch.com xabar beradi.
Qimmatli qogʻozlar va birjalar komissiyasiga (SEC) taqdim etilgan hisobotga koʻra, moliyalashtirish jarayonida Ares Management va bir nechta institutsional investorlar ishtirok etgan. Bitim doirasida investorlarga kelajakda aksiyalarni 6 dollardan sotib olish huquqini beruvchi varrantlar ham taqdim etilgan. Ushbu mablagʻlar kompaniyaning avtonom yuk tashish texnologiyalarini kengaytirish va operatsion xarajatlarni qoplash uchun yoʻnaltiriladi.
Kodiak AI joriy yilning birinchi choragida 1,8 million dollar daromad koʻrgan boʻlsa-da, operatsion zararlar 37,8 million dollarni tashkil etdi. Bu oʻtgan yilgi koʻrsatkichdan ikki baravar koʻpdir. Moliyaviy qiyinchiliklarga qaramay, kompaniya Roehl Transport bilan yangi tijorat shartnomasini imzoladi va Kanada hududida logistika sohasida sinov dasturlarini boshladi.
Kompaniya asoschisi va bosh direktori Don Burnette joriy yil oxirigacha umumiy foydalanishdagi avtomobil yoʻllarida haydovchisiz yuk tashish operatsiyalarini yoʻlga qoʻyishni rejalashtirmoqda. Hozirgi vaqtda yuk mashinalari avtonom tarzda harakatlansa-da, xavfsizlik nuqtai nazaridan rul ortida doimo operator nazorati saqlanib qolmoqda.
“Zamin”ni Telegramʻda oʻqing!
