Yevropa Ittifoqi Osiyo va Yevropa oʻrtasidagi internet aloqasini xavfsizroq qilish maqsadida Arktika orqali yangi suvosti kabellarini yotqizish imkoniyatini koʻrib chiqmoqda. Hozirgi kunda global trafikning qariyb 90 foizi Yaqin Sharq va Qizil dengiz hududlari orqali oʻtadi, bu esa mintaqadagi geosiyosiy beqarorlik tufayli jiddiy xavf tugʻdirmoqda. Bu haqda Ixbt.com xabar beradi.
The Verge nashrining xabar berishicha, muhokama qilinayotgan loyihalardan biri Polar Connect deb nomlanadi. U Skandinaviyadan Osiyoga toʻgʻridan-toʻgʻri Shimoliy qutb orqali maʼlumotlar uzatish kanalini yaratishni koʻzda tutadi. Muqobil variant sifatida Kanada qirgʻoqlari yaqinidagi Shimoli-gʻarbiy oʻtish yoʻli ham koʻrib chiqilmoqda.
Yangi marshrutlarga oʻtish zarurati Qizil dengizdagi tez-tez sodir boʻlayotgan avariyalar bilan bogʻliq. Xususan, xusiylar hujumlari va kema langarlarining kabellarga shikast yetkazishi internet aloqasida uzoq muddatli uzilishlarga sabab boʻlmoqda. Bunday nosozliklarni bartaraf etish esa murakkab xalqaro kelishuvlar va oylab vaqt talab qiladi.
Arktika loyihasini amalga oshirishda texnik qiyinchiliklar ham mavjud. Muzliklar va aysberglar suvosti kabellariga doimiy xavf soladi, shuningdek, bunday ekstremal sharoitlarda taʼmirlash ishlarini olib boradigan maxsus muzqorar kemalar yetishmaydi. Avvalroq Quintillion loyihasida kuzatilgan nosozliklar ham ushbu hududda ishlash qanchalik murakkab ekanligini koʻrsatgan edi.
Shunga qaramay, Yevropa Ittifoqi ushbu infratuzilmani strategik zaxira yoʻli sifatida koʻrmoqda. Mutaxassislar yangi aloqa liniyalarining ishga tushirilishini 2030-yilga yaqin davrga moʻljallamoqda.
“Zamin”ni Telegramʻda oʻqing!
