Yirik texnologiya kompaniyalari sunʻiy intellektni (AI) joriy etish strategiyalarini qayta koʻrib chiqishni boshladi. Kutilmagan samaradorlik oʻrniga ular yangi muammoga duch kelishdi: xodimlar AI vositalaridan qanchalik faol foydalansa, xarajatlar shunchalik tez oʻsib, iqtisodiy modelni ushlab turish qiyinlashmoqda. Xususan, Microsoft kompaniyasi oʻz muhandislariga Claude Code litsenziyalarini berishni toʻxtatib, ularni GitHub Copilot CLI platformasiga oʻtkazmoqda. Bu haqda Ixbt.com xabar beradi.
Ushbu qaror Anthropic vositalaridan keng foydalanila boshlanganidan atigi yarim yil oʻtib qabul qilindi. Garchi Microsoft va Anthropic oʻrtasidagi strategik hamkorlik hamda koʻp milliard dollarlik bulutli kelishuvlar oʻz kuchida qolsa-da, ichki operatsion model tejamkorlik rejimiga oʻtmoqda. Shunga oʻxshash holat Uber kompaniyasida ham kuzatildi: kompaniya 2026-yil uchun moʻljallangan AI-budjetini joriy yilning dastlabki toʻrt oyidayoq sarflab boʻlgan.
Hozirgi bosqichda asosiy ziddiyat shundaki, AI vositalari alohida vazifalar unumdorligini oshirsa-da, hisoblash quvvatlariga boʻlgan ehtiyojni va umumiy xarajatlarni keskin koʻpaytirib yubormoqda. Goldman Sachs tahlilchilariga koʻra, 2030-yilga borib agentli AI tizimlarining ommalashishi oylik tokenlar isteʻmolini yuzlab kvadrillionga yetkazishi mumkin, bu esa infratuzilmaga eksponensial bosim yuklaydi.
Gartner tadqiqotlari 2030-yilga kelib yirik til modellarida soʻrovlarni qayta ishlash narxi 90 foizga arzonlashishini bashorat qilmoqda. Biroq, bu korporativ xarajatlar kamayishini anglatmaydi. Murakkab agentli tizimlar bitta vazifa uchun ancha koʻp token sarflaydi, bu esa hisoblash birligi narxi tushishini qoplab ketadi. Natijada, texnologiya arzonlashgani sari umumiy xarajatlar oshib boradigan paradoksal dinamika yuzaga kelmoqda.
Texnogigantlar rahbarlari raqamli assistentlar ish jarayonlariga toʻliq integratsiya qilingan "agentli kelajak" gʻoyasini ilgari surishda davom etmoqda. Biroq, soʻnggi maʻlumotlar ushbu modelni kengaytirish dastlabki prognozlardan koʻra ancha qimmatga tushishi mumkinligini koʻrsatmoqda.
“Zamin”ni Telegramʻda oʻqing!
