AQSH Federal aviatsiya boshqarmasi (FAA) Starship V3 raketasining parvozlarini rasman toʻxtatdi. Ushbu qaror raketaning debyut parvozidan besh kun oʻtib qabul qilindi. Regulyator 22-may kuni amalga oshirilgan startni “insident” deb tasnifladi va hodisa yuzasidan sinchkovlik bilan tekshiruv oʻtkazishni talab qildi. Bu haqda Ixbt.com xabar beradi.
FAA bayonotiga koʻra, Starship-Super Heavy majmuasining parvozlari faqatgina barcha tizim va jarayonlar jamoat xavfsizligiga tahdid solmasligi tasdiqlanganidan keyin tiklanishi mumkin. Garchi regulyator parvozni toʻxtatgan boʻlsa-da, Starship dasturi doirasidagi 12-suborbital parvoz koʻp jihatdan muvaffaqiyatli deb topildi.
Parvoz davomida Ship kemasi ilk bor koinotga 20 ta Starlink sunʼiy yoʻldoshi maketini va issiqlikdan himoya ekrani holatini kuzatish uchun maxsus kameralar bilan jihozlangan ikkita real apparatni olib chiqdi. Shuningdek, yuqori bosqich atmosferaning zich qatlamlariga kirishdagi ekstremal yuklamalarga bardosh berib, Hind okeaniga yumshoq qoʻnishni amalga oshirdi.
Asosiy muammo birinchi bosqich — Super Heavy tezlatgichi bilan bogʻliq holda yuzaga keldi. Gigant tezlatgich Meksika qoʻltigʻiga nazorat ostida yumshoq qoʻnishi kerak edi, biroq tormozlanish uchun dvigatellarning yakuniy ishga tushishi kutilganidek amalga oshmadi. Natijada bosqich suvga qattiq zarba bilan tushdi, bu esa aviatsiya hukumatining aralashuviga sabab boʻldi.
Belgilangan reglamentga muvofiq, SpaceX kompaniyasi avariya sabablarini aniqlash boʻyicha ichki surishtiruv oʻtkazadi. Butun jarayon FAA mutaxassislari nazorati ostida kechadi va ular yakuniy hisobot hamda tuzatish choralarini tasdiqlashi lozim. Hozircha tekshiruvning aniq muddatlari maʼlum qilinmagan.
“Zamin”ni Telegramʻda oʻqing!
